RBI : దేశంలోని ప్రముఖ ప్రైవేట్ రంగ బ్యాంక్ బంధన్ బ్యాంక్పై భారతీయ రిజర్వ్ బ్యాంక్ (RBI) జరిమానా విధించింది. బ్యాంకు కొన్ని నియమాలు, మార్గదర్శకాలను పాటించకపోవడంతో ఆర్బిఐ రూ.44.7 లక్షల జరిమానాను విధించినట్లు శుక్రవారం వెల్లడించింది.
RBI – తనిఖీ తర్వాత చర్య
2024 మార్చి 31 వరకు బంధన్ బ్యాంక్ ఆర్థిక స్థితిపై ఆర్బిఐ (RBI) చట్టబద్ధ తనిఖీ చేపట్టింది. ఆ తనిఖీలో బ్యాంకు నియమాలను ఉల్లంఘించినట్లు తేలింది. ఈ నేపథ్యంలో, జరిమానా ఎందుకు విధించకూడదని అడుగుతూ ఆర్బిఐ బ్యాంకుకు నోటీసు జారీ చేసింది. సమీక్ష అనంతరం, విధానాల్ని పాటించలేదని తేలడంతో కేంద్ర బ్యాంకు ఈ ఆర్థిక శిక్షను అమలు చేసింది.
ఉల్లంఘనల వివరాలు
దర్యాప్తులో బంధన్ బ్యాంక్ కొందరు ఉద్యోగులకు కమిషన్ చెల్లించినట్లు, కొన్నింటి ఖాతా డేటాను మార్చినట్లు, సిస్టమ్ ఆడిట్ ట్రయల్స్/లాగ్లను సక్రమంగా నమోదు చేయలేదని ఆర్బిఐ గుర్తించింది. అదనంగా, యూజర్ వివరాల నిర్వహణలో కూడా లోపాలు ఉన్నట్లు తేలింది.
కస్టమర్లకు ప్రభావం ఉండదు
ఈ జరిమానా కేవలం నియమ నిబంధనల ఉల్లంఘనకే సంబంధించినదని, బ్యాంకు కస్టమర్ల లావాదేవీలు లేదా ఒప్పందాలకు సంబంధం లేదని ఆర్బిఐ స్పష్టం చేసింది. కస్టమర్ల నిధులు లేదా సేవలకు ఈ నిర్ణయం ప్రభావం చూపదని స్పష్టం చేసింది.
ఆర్బిఐ హెచ్చరిక
బ్యాంకింగ్ రంగంలో పారదర్శకతను కాపాడుకోవడం, కస్టమర్ల విశ్వాసాన్ని నిలుపుకోవడం కోసం అన్ని బ్యాంకులు కచ్చితంగా నియమాలు పాటించాలని ఆర్బిఐ మరోసారి హెచ్చరించింది. ఈ జరిమానా చర్యను రంగంలోని మిగతా బ్యాంకులకు ఒక గట్టి హెచ్చరికగా భావిస్తున్నారు.
Also Read : Today Gold Price : నేడు భగ్గుమన్న బంగారం ధరలు