Mukesh Ambani : ప్రస్తుత ఆర్థిక సంవత్సరం జూలై–సెప్టెంబరు త్రైమాసికం (క్యూ2)లో రిలయన్స్ ఇండస్ట్రీస్ లిమిటెడ్ (ఆర్ఐఎల్) మంచి ఆర్థిక ఫలితాలను నమోదు చేసింది. సంస్థ కన్సాలిడేటెడ్ నికర లాభం 9.6 శాతం పెరిగి రూ.18,165 కోట్లకు చేరింది. గత ఏడాది ఇదే కాలంలో లాభం రూ.16,563 కోట్లుగా ఉండగా, ఈసారి రిటైల్ మరియు టెలికాం విభాగాల బలమైన వృద్ధి ఆ ఫలితాలకు ప్రధాన బలమైంది.
సమీక్షా కాలంలో కంపెనీ మొత్తం ఆదాయం 9.9 శాతం పెరిగి రూ.2,83,548 కోట్లుగా నమోదైంది. అయితే, ఇన్వెంటరీ నష్టాల ప్రభావంతో జూన్ త్రైమాసికానికి ప్రకటించిన రూ.26,994 కోట్ల లాభంతో పోలిస్తే 33 శాతం తగ్గుదల నమోదైంది.
Mukesh Ambani – టెలికాం, రిటైల్ విభాగాల దూకుడు
జియో (Jio) విభాగంలో కొత్త కస్టమర్లు చేరడం, ఒక్కో వినియోగదారునిపై ఆదాయం (ARPU) పెరగడం, అలాగే వైర్లెస్ బ్రాడ్బ్యాండ్ సేవలు ప్రపంచస్థాయిలో విస్తరించడం వల్ల టెలికాం ఆదాయం 13 శాతం పెరిగింది. ఈ ఏడాది సెప్టెంబరు 30 నాటికి కంపెనీ రుణభారం రూ.3.48 లక్షల కోట్లకు చేరింది.
ఆయిల్ రంగం పునరుజ్జీవనం
జామ్నగర్ రిఫైనరీలు, పెట్రోకెమికల్ ప్లాంట్లు మెరుగైన పనితీరు కనబర్చాయి. ఆయిల్ రంగం స్థూల లాభం (EBITDA) 21 శాతం పెరిగి రూ.15,008 కోట్లకు చేరింది. అయితే, క్రూడ్ ఆయిల్ ధరలు పడిపోవడంతో ఇన్వెంటరీ నష్టం రూ.8,421 కోట్లకు పెరిగింది.
వినియోగ వస్తువుల విభాగం పుంజుకుంది
రిలయన్స్ కన్స్యూమర్ ప్రోడక్ట్స్ (RCPL) ప్రస్తుత ఆర్థిక సంవత్సరం ప్రథమార్ధంలో రూ.9,850 కోట్ల స్థూల ఆదాయాన్ని నమోదు చేసింది.
జియో ప్లాట్ఫామ్స్ లాభం 13% పెరుగుదల
జియో (Jio) ప్లాట్ఫామ్స్ లాభం క్యూ2లో 13 శాతం పెరిగి రూ.7,379 కోట్లకు చేరింది. ఒక్కో వినియోగదారునిపై సగటు ఆదాయం రూ.208.8 నుంచి రూ.211.4కి పెరిగింది. జియో ఎయిర్ ఫైబర్ చందాదారులు 95 లక్షల మార్కును దాటారు.
రిటైల్ విభాగం దూకుడు కొనసాగింది
రిలయన్స్ రిటైల్ వెంచర్స్ లిమిటెడ్ లాభం వార్షిక ప్రాతిపదికన 22 శాతం పెరిగి రూ.3,457 కోట్లకు చేరింది. మీడియా, ఎంటర్టైన్మెంట్ విభాగం జియో స్టార్ రూ.7,232 కోట్ల ఆదాయంపై రూ.1,322 కోట్ల లాభం సాధించింది.
క్విక్ కామర్స్ విస్తరణ
రిలయన్స్ హైపర్-లోకల్ కామర్స్ వ్యాపారం 1,000 నగరాలు, 5,000 పిన్కోడ్ ప్రాంతాలకు విస్తరించింది. 30 నిమిషాల్లో ఆర్డర్ డెలివరీ అందించే ఈ సర్వీసు కస్టమర్ల స్పందనను సొంతం చేసుకుంది.
రిలయన్స్ సీఈఓ వ్యాఖ్యలు
“ఓ2సీ, జియో, రిటైల్ విభాగాల ప్రదర్శనతో రిలయన్స్ రెండో త్రైమాసికంలో బలమైన వృద్ధి సాధించింది. కొత్త చందాదారుల చేరిక, ప్రభుత్వ సంస్కరణలు వినియోగ వృద్ధికి దోహదపడ్డాయి. దీని ఫలితంగా కంపెనీ ఆదాయం మరియు లాభదాయకత మరింతగా బలోపేతం అవుతున్నాయి,” అని సంస్థ ప్రతినిధులు తెలిపారు.
Also Read : Stock Market Growth : దీపావళికి ముందే మార్కెట్ దూకుడు!