Infosys : పెళ్లి, కుటుంబం లేదా పిల్లల సంరక్షణ కోసం ఉద్యోగాలను మానేసిన మహిళలకు మరోసారి కెరీర్ ప్రారంభించుకునే అవకాశం ఇన్ఫోసిస్ (Infosys) కల్పిస్తోంది. ఈ ఐటీ దిగ్గజ సంస్థ “రీస్టార్ట్ విత్ ఇన్ఫోసిస్” అనే ప్రత్యేక కార్యక్రమాన్ని ప్రారంభించింది. ఈ పథకం ద్వారా సెలీనియం, జావా, ఒరాకిల్, సేల్స్ఫోర్స్ వంటి టెక్నాలజీ రంగాల్లో అనుభవం ఉన్న మహిళలను తిరిగి నియమించేందుకు కంపెనీ ముందడుగు వేసింది.
Infosys – రిఫర్ చేసిన వారికి ప్రోత్సాహక బోనస్లు
ఈ కార్యక్రమంలో భాగంగా, ఉద్యోగం మానేసిన మహిళలను రిఫర్ చేసే ఉద్యోగులకు కంపెనీ ఆకర్షణీయమైన బోనస్లు అందిస్తోంది:
- జాబ్ లెవల్ 3: రూ. 10,000
- జాబ్ లెవల్ 4: రూ. 25,000
- జాబ్ లెవల్ 5: రూ. 35,000
- జాబ్ లెవల్ 6: రూ. 50,000
ఈ బోనస్లు రిఫర్ చేసిన అభ్యర్థి విజయవంతంగా ఉద్యోగంలో చేరిన తర్వాత మాత్రమే చెల్లిస్తారు.
అర్హత ప్రమాణాలు
- కనీసం రెండు సంవత్సరాల పని అనుభవం ఉండాలి.
- కనీసం ఆరు నెలల పాటు ఉద్యోగ విరామం తీసుకొని ఉండాలి.
ఇన్ఫోసిస్ ప్రకారం, ఈ పథకం లక్ష్యం కెరీర్కు విరామం తీసుకున్న మహిళలకు మద్దతు ఇవ్వడం, వారిని తిరిగి వృత్తిపరంగా ఎదగడానికి అవకాశం కల్పించడం.
మహిళా ఉద్యోగుల సంఖ్య పెంపే లక్ష్యం
ప్రస్తుతం ఇన్ఫోసిస్లో (Infosys) పనిచేస్తున్న 3.2 లక్షల మంది ఉద్యోగులలో 39 శాతం మహిళలు ఉన్నారు. ఈ శాతం 2030 నాటికి 45కు పెంచాలని సంస్థ లక్ష్యంగా పెట్టుకుంది. ఇది కేవలం ఇన్ఫోసిస్లోనే కాకుండా మొత్తం ఐటీ రంగంలో మహిళల భాగస్వామ్యాన్ని పెంచే ప్రయత్నంగా భావించబడుతోంది.
సంస్థ అభిప్రాయం
ఇన్ఫోసిస్ CHRO షాజీ మాథ్యూ మాట్లాడుతూ, ఈ పథకం తమ ఎన్విరాన్మెంటల్, సోషల్ అండ్ గవర్నెన్స్ (ESG) లక్ష్యాలలో భాగమని తెలిపారు. టెక్ రంగంలో ప్రతిభావంతులైన మహిళలు తిరిగి వృత్తిలో అడుగుపెట్టేలా ఈ ప్రయత్నం దోహదపడుతుందని ఆయన అభిప్రాయపడ్డారు.
గత ఆర్థిక సంవత్సరంలోనే ఈ కార్యక్రమం ద్వారా 900 మందికి పైగా మహిళలను మధ్యస్థాయి ఉద్యోగాల్లో నియమించుకున్నట్టు కంపెనీ వెల్లడించింది. ఇలాంటి కార్యక్రమాలతో ఇన్ఫోసిస్ ఇతర సంస్థలకు ఆదర్శంగా నిలుస్తోందని నిపుణులు అభిప్రాయపడుతున్నారు.
Also Read : Today Gold Price : మళ్లీ పెరిగిన పసిడి ధరలు