Forbes : ప్రపంచ ప్రఖ్యాత ఆర్థిక పత్రిక ఫోర్బ్స్ (Forbes) విడుదల చేసిన “2025 భారతదేశ అత్యంత ధనవంతుల 100 మంది” జాబితాలో రిలయన్స్ ఇండస్ట్రీస్ చైర్మన్ ముకేశ్ అంబానీ మళ్లీ అగ్రస్థానాన్ని నిలబెట్టుకున్నారు. ఆయన మొత్తం ఆస్తులు 105 బిలియన్ అమెరికన్ డాలర్లు, అంటే సుమారు రూ.9.32 లక్షల కోట్లుగా అంచనా వేయబడ్డాయి. గత ఏడాదితో పోలిస్తే ఆయన సంపద 12 శాతం మేర తగ్గిందని ఫోర్బ్స్ తెలిపింది.
Forbes Update
అదానీ గ్రూప్ చైర్మన్ గౌతమ్ అదానీ 92 బిలియన్ డాలర్ల (రూ.8.17 లక్షల కోట్లు) నికర ఆస్తులతో రెండవ స్థానంలో నిలిచారు. గతేడాది మార్కెట్ ఒడిదుడుకుల తరువాత కూడా అదానీ గ్రూప్ స్థిరంగా ముందుకు సాగుతున్నదని ఫోర్బ్స్ (Forbes) విశ్లేషించింది.
ఓపీ జిందాల్ గ్రూప్ చైర్మన్ సావిత్రి జిందాల్ మరియు ఆమె కుటుంబం 40.2 బిలియన్ డాలర్ల (రూ.3.57 లక్షల కోట్లు) ఆస్తులతో మూడవ స్థానాన్ని దక్కించుకున్నారు. ఈ జాబితాలో ఉన్న టాప్ 10 ధనవంతులలో ఏకైక మహిళ ఆమె కావడం విశేషం.
భారతీ ఎయిర్టెల్ చైర్మన్ సునీల్ మిట్టల్, హెచ్సీఎల్ టెక్నాలజీస్ వ్యవస్థాపకుడు శివ్ నాడార్ వరుసగా నాలుగో, ఐదో స్థానాలు దక్కించుకున్నారు. సాంకేతిక రంగం, టెలికమ్యూనికేషన్ విభాగాల్లో ఈ ఇద్దరి వ్యాపార విస్తరణలు స్థిరంగా కొనసాగుతున్నాయని ఫోర్బ్స్ పేర్కొంది.
తెలుగువారి విషయానికొస్తే, ఈసారి ఆరుగురు తెలుగు వ్యాపారవేత్తలు ఫోర్బ్స్ జాబితాలో చోటు దక్కించుకున్నారు. అందులో దివీస్ ల్యాబ్స్ అధినేత మురళి దివి అగ్రస్థానంలో నిలిచారు. ఆయనతో పాటు ఫార్మా, ఐటీ, ఇన్ఫ్రాస్ట్రక్చర్ రంగాల నుంచి మరికొందరు తెలుగు పరిశ్రమల ప్రముఖులు కూడా జాబితాలో ఉన్నారు.
ఫోర్బ్స్ వెల్లడించిన వివరాల ప్రకారం, భారత ఆర్థిక వ్యవస్థ వేగంగా ఎదుగుతున్న నేపథ్యంలో వ్యాపార రంగంలో పోటీ మరింత తీవ్రమవుతుందని, అయినప్పటికీ అగ్ర 100 మందిలో చాలా మంది తమ స్థానం నిలబెట్టుకోవడంలో విజయవంతమయ్యారని తెలిపింది.
మొత్తం మీద, ముకేశ్ అంబానీ మరియు గౌతమ్ అదానీ మధ్య పోటీ కొనసాగుతూనే ఉండగా, మహిళా పరిశ్రమాధిపతుల ప్రాతినిధ్యం ఈ ఏడాది గణనీయంగా పెరిగినట్లు ఫోర్బ్స్ నివేదిక స్పష్టం చేసింది.
Also Read : Today Gold Price : పసిడి ధరల్లో స్వల్ప తగ్గుదల..వెండి మాత్రం మండుతుంది