RBI : రుణాల వసూలులో పారదర్శకతను పెంచే దిశగా భారతీయ రిజర్వ్ బ్యాంక్ (RBI) కొత్త నియమాన్ని రూపొందించేందుకు ప్రయత్నిస్తోంది. ఈ నిబంధన అమలులోకి వస్తే, రుణం తిరిగి చెల్లించని వారి మొబైల్ ఫోన్లను రిమోట్గా లాక్ చేసే అధికారం రుణదాతలకు ఇవ్వబడనుంది. అయితే, ఈ ప్రతిపాదన వినియోగదారుల హక్కుల పరిరక్షణపై ఆందోళనలను కూడా రేకెత్తిస్తోంది.
RBI – వినియోగదారులపై ప్రభావం
2024లో హోమ్ క్రెడిట్ ఫైనాన్స్ చేసిన అధ్యయనంలో, భారతీయులు మొబైల్ ఫోన్లు సహా ఎలక్ట్రానిక్ వస్తువులలో మూడింట ఒక వంతుకంటే ఎక్కువను రుణాలపై కొనుగోలు చేస్తున్నారని తేలింది. టెలికాం నియంత్రణ సంస్థ సమాచారం ప్రకారం, దేశ జనాభా 1.4 బిలియన్లకు పైగా ఉండగా, 1.16 బిలియన్లకు పైగా మొబైల్ కనెక్షన్లు ఉన్నాయి. ఈ పరిస్థితుల్లో ఫోన్-లాకింగ్ విధానం అమలు చేస్తే, ఇది పెద్ద సంఖ్యలో వినియోగదారులను ప్రభావితం చేసే అవకాశం ఉంది.
డేటా భద్రతా అంశం
గత ఏడాది ఆర్బీఐ (RBI) రుణదాతలను ఫోన్ లాక్ విధానాన్ని నిలిపివేయాలని కోరింది. సాధారణంగా రుణం మంజూరైనప్పుడు ప్రత్యేక యాప్ను ఫోన్లో ఇన్స్టాల్ చేసి, డిఫాల్ట్ జరిగితే పరికరాన్ని లాక్ చేస్తారు. అయితే, ఫోన్ లాక్ చేసినా వ్యక్తిగత డేటా సురక్షితంగా ఉంటుందని ఆర్బీఐ నిర్ధారించాలనుకుంటోంది. రాబోయే నెలల్లో ఫెయిర్ ప్రాక్టీస్ కోడ్ అప్డేట్ చేస్తూ, ఈ విధానం పై మార్గదర్శకాలను జారీ చేసే అవకాశం ఉందని ఆర్థిక వర్గాలు చెబుతున్నాయి.
కంపెనీలకు లాభాలు
ఈ ప్రతిపాదన అమలు అయితే, బజాజ్ ఫైనాన్స్, DMI ఫైనాన్స్, చోళమండలం ఫైనాన్స్ వంటి వినియోగదారుల రుణాలు అందించే సంస్థలకు రికవరీ అవకాశాలు పెరుగుతాయని నిపుణులు అంచనా వేస్తున్నారు. క్రెడిట్ బ్యూరో CRIF హైమార్క్ ప్రకారం, ₹1,00,000 కంటే తక్కువ రుణాలు డిఫాల్ట్ అయ్యే ప్రమాదం ఎక్కువగా ఉంటుందని గుర్తించింది.
ఆర్బీఐ వైఖరి
ఆర్బీఐ ఇంకా ఈ ప్రతిపాదనపై అధికారికంగా స్పందించనప్పటికీ, రుణదాతలతో చర్చలు కొనసాగుతున్నాయి. తుది నిర్ణయం తీసుకునే ముందు వినియోగదారుల హక్కులను పరిరక్షించడం, అలాగే రుణదాతల ప్రయోజనాలను కాపాడడం అనే రెండు అంశాలను సమతుల్యం చేయాలని ఆర్బీఐ లక్ష్యంగా పెట్టుకుంది.
Also Read : Honda Huge Price Reduction : హోండా బైక్ ధరలకు భారీ తగ్గింపు – జీఎస్టీ ప్రయోజనం