అమరావతి : రోజు రోజుకు సైబర్ నేరాలు పెరుగుతున్నాయి. గత ఏడాది ఏకంగా వేల కోట్లు నొక్కేశారు. తాజాగా వీరి బారిన పడ్డారు భారత దేశంలో అత్యంత పేరు పొందిన మాజీ సీబీఐ డైరెక్టర్ జేడీ లక్ష్మీ నారాయణ. ఆయన భార్య ఖాతాలో ఉన్న రూ. 2.58 కోట్లు కొట్టేశారు సైబర్ నేరగాళ్లు. ఆ మొత్తాన్ని సమకూర్చడానికి ఆమె తన వద్ద, తన భర్త వద్ద ఉన్న బంగారాన్ని తాకట్టు పెట్టింది. నేరగాళ్లలో ఒకడైన దినేష్ సింగ్ జేడీ భార్య ఊర్మిళ నమ్మించాడు. తాము సూచించిన పద్ధతిలో డబ్బు పెట్టుబడి పెడితే 500% వరకు లాభాలు సంపాదించవచ్చని కొన్ని స్క్రీన్షాట్లను పంపి ఒప్పించాడు. తన వాదనలను బలపరుస్తూ, ఆ బృందంలోని మరో సభ్యురాలు కూడా వారి సలహా పాటించినప్పుడు తాను భారీ లాభాలు సంపాదించినట్లు స్క్రీన్షాట్లను పంచుకుంది.
స్టాక్ మార్కెట్లో పెట్టుబడి పెడతామని చెప్పి నేరగాళ్లు లక్ష్మీనారాయణ భార్య ఊర్మిళ నుండి రూ. 2.58 కోట్లు తీసుకున్నారు. ఊర్మిళకు పంపిన వాట్సాప్ సందేశంలో, తమ ప్రణాళిక ప్రకారం డబ్బు పెట్టుబడి పెడితే, చాలా తక్కువ సమయంలో గరిష్ట లాభాలు సంపాదించవచ్చని వారు చెప్పారు. ఆమె ‘స్టాక్ మార్కెట్ ప్రాఫిట్ గైడ్ ఎక్స్ఛేంజ్ 20’ అనే వాట్సాప్ గ్రూప్లో చేరినప్పుడు ఈ సందేశం ఆమెకు పంపబడింది. సింగ్ మాటలు నమ్మి, ఊర్మిళ ఆపిల్ యాప్ స్టోర్ నుండి MCKIEY CM యాప్ను డౌన్లోడ్ చేసుకుని, డిసెంబర్ 24 నుండి జనవరి 5 మధ్య నేరగాళ్లకు రూ. 2.58 కోట్లు బదిలీ చేసింది. యాప్లో తన డబ్బు భారీ లాభాలను ఆర్జించినట్లు కనిపించినా, ఆ మొత్తాన్ని విత్డ్రా చేసుకునే మార్గం కనిపించక పోవడంతో తాను మోసపోయానని ఆమె గ్రహించింది. వెంటనే, ఆమె సైబర్ క్రైమ్ పోలీసులకు ఫిర్యాదు చేసింది. నేరగాళ్లు ఆ డబ్బును మ్యూల్ ఖాతాలకు బదిలీ చేశారని, ఈ విషయంపై దర్యాప్తు చేస్తున్నామని పోలీసులు తెలిపారు.