హైద‌రాబాద్ : హైదరాబాద్‌ను ప్రపంచ ఆవిష్కరణల కేంద్రంగా తీర్చిదిద్దడంలో టీ-హబ్ కీలక పాత్ర పోషించిందని బీఆర్ఎస్ వర్కింగ్ ప్రెసిడెంట్ కేటీ రామారావు అన్నారు. టీ-హబ్ 11వ వార్షికోత్సవం సందర్భంగా ఆయన మాట్లాడారు. ఈ సంస్థ వ్యవస్థాపకులను మార్గదర్శకులు, పెట్టుబడిదారులతో అనుసంధానించి 3,300కు పైగా స్టార్టప్‌లకు సాధికారత కల్పించిందని తెలిపారు. మాజీ ముఖ్యమంత్రి కే చంద్రశేఖర్ రావు హయాంలో స్థాపించిన టీ-హబ్ హైదరాబాద్‌ను ప్రపంచ ఆవిష్కరణల కేంద్రంగా తీర్చిదిద్దడంలో కీలక పాత్ర పోషించిందని మాజీ ఐటీ మంత్రి కేటీ రామారావు అన్నారు.
టీ-హబ్ 11వ వార్షికోత్సవం సందర్భంగా రామారావు ముఖ్య అతిథిగా పాల్గొని ప్ర‌సంగించారు. “కలలకు రెక్కలు ఇవ్వడం” అనే నినాదం ఈ సంస్థ లక్ష్యాన్ని సంపూర్ణంగా ప్రతిబింబిస్తుందని అన్నారు. గత 11 ఏళ్లలో వ్యవస్థాపకులను మార్గదర్శకులు, పెట్టుబడిదారులు, పారిశ్రామిక నాయకులు, ప్రపంచ అవకాశాలతో అనుసంధానించడం చేప‌ట్టిన‌ట్లు తెలిపారు.ఈ ప్ర‌యోగం ఎన్నో ఫ‌లితాల‌ను ఇచ్చింద‌ని చెప్పారు. దీని ద్వారా స్టార్టప్‌లకు సాధికారత కల్పించిందని ఆయన తెలిపారు. తెలంగాణ ఆశయానికి, పారిశ్రామిక స్ఫూర్తికి టి-హబ్ ఒక ప్రతీకగా నిలిచిందని చెప్పారు కేటీఆర్, ఇది దేశవ్యాప్తంగా ఇలాంటి కార్యక్రమాలకు స్ఫూర్తినిస్తూ హైదరాబాద్‌ను ప్రపంచ ఆవిష్కరణల పటంలో సుస్థిరంగా నిలబెట్టిందని ఆయన అన్నారు.
హైదరాబాద్‌ను ఆవిష్కరణలకు, వ్యవస్థాపకతకు కేంద్రంగా తీర్చిదిద్దాలనే దార్శనికతతో ఈ సంస్థను స్థాపించారని మాజీ ఐటీ మంత్రి అన్నారు. ఇది ఆలోచనలను ప్రోత్సహిస్తూ, ఆవిష్కర్తలకు మద్దతునిస్తూ, వారి కలలను సాకారం చేయడంలో సహాయ పడుతుందని ఆయన విశ్వాసం వ్యక్తం చేశారు .టి-హబ్ ప్రారంభోత్సవంలో దివంగత దిగ్గజ పారిశ్రామికవేత్త రతన్ టాటా చెప్పిన మాటలను గుర్తు చేసుకుంటూ ఈ సంస్థ నిజంగానే “ఆధునిక భారతదేశపు ముఖచిత్రం” అని రామారావు అన్నారు.