అమ‌రావ‌తి : ఏపీఎస్ఆర్టీసీ ఆదాయ నష్టాలను అరికట్టేందుకు చ‌ర్య‌లు చేప‌ట్టింది. ఇందులో బాగంగా 125 మంది డిపో మేనేజర్లకు ఆర్టీసీ శిక్షణ; ఆర్థిక క్రమశిక్షణ, పారదర్శకతపై ప్రత్యేక దృష్టి పెట్టింది. విజయవాడలోని ఏపీఎస్ఆర్టీసీ ప్రధాన కార్యాలయంలో జరిగిన డిపో మేనేజర్ల ప్రత్యేక శిక్షణ కార్యక్రమంలో ఏపీఎస్ఆర్టీసీ జాయింట్ మేనేజింగ్ డైరెక్టర్ ఎం. శివప్రసాద్, ఎగ్జిక్యూటివ్ డైరెక్టర్లు కె.ఎస్. బ్రహ్మానంద రెడ్డి, జి.వి. రవివర్మ పాల్గొన్నారు. ఆంధ్రప్రదేశ్ రాష్ట్ర రోడ్డు రవాణా సంస్థ రాష్ట్ర వ్యాప్తంగా ఉన్న 125 మంది డిపో మేనేజర్ల కోసం ఒక ప్రత్యేక శిక్షణ కార్యక్రమాన్ని ప్రారంభించింది. సాంకేతిక లోపాలు, ఆర్థిక అవకతవకలు , ఆదాయ నష్టాలను అరికట్టడం, అలాగే పరిపాలనా సామర్థ్యాన్ని పెంపొందించడం ఈ శిక్షణ ముఖ్య ఉద్దేశ్యం. నవంబర్ 20 వరకు నాలుగు విడతలుగా ఈ శిక్షణ కొనసాగుతుంది. మొదటి విడతలో వివిధ ప్రాంతాలకు చెందిన 30 మంది డిపో మేనేజర్లు ఆర్టీసీ ప్రధాన కార్యాలయంలో శిక్షణను ప్రారంభించారు.
తదుపరి విడతల్లో వరుసగా 27, 34, 34 మంది చొప్పున మొత్తం 125 మందికి శిక్షణ ఇవ్వనున్నారు. ఆర్టీసీ ట్రాన్స్‌పోర్ట్ అకాడమీ , ప్రధాన కార్యాలయం సంయుక్తంగా నిర్వహిస్తున్న ఈ కార్యక్రమం, ట్రాన్స్‌పోర్ట్ అకాడమీ ప్రిన్సిపాల్ పాని చక్ర తేజ పర్యవేక్షణలో జరుగుతోంది. ప్రారంభ కార్యక్రమంలో ఏపీఎస్ఆర్టీసీ జాయింట్ మేనేజింగ్ డైరెక్టర్ ఎం. శివప్రసాద్, ఎగ్జిక్యూటివ్ డైరెక్టర్లు కె.ఎస్. బ్రహ్మానంద రెడ్డి (పరిపాలన), జి.వి. రవివర్మ (ఇంజనీరింగ్) , ఇతర ఉన్నతాధికారులు పాల్గొని, డిపో మేనేజర్లకు దిశానిర్దేశం చేశారు. ఈ సందర్భంగా ఎం. శివప్రసాద్ మాట్లాడుతూ సంస్థ ఆదాయాన్ని కాపాడటం, పారదర్శకతను పాటించడం ,జవాబుదారీతనంతో వ్యవహరించడం ప్రతి డిపో మేనేజర్ ప్రాథమిక బాధ్యత అని నొక్కి చెప్పారు. సాంకేతికపరమైన లోపాలను గుర్తించడం, ఆదాయం వృథా కాకుండా చూడటం, రికార్డులు , ఆర్థిక లావాదేవీలను క్రమం తప్పకుండా సమీక్షించడం, అలాగే వివిధ విభాగాల మధ్య సమన్వయాన్ని మెరుగు పరచడంపై ప్రత్యేక దృష్టి సారించాలని ఆయన సూచించారు.
ఈ శిక్షణలో సిబ్బంది నిర్వహణ, అకౌంట్స్, మెకానికల్ కార్యకలాపాలు, వాణిజ్య . లాజిస్టిక్స్ కార్యకలాపాలు, రోజువారీ నిర్వహణ , సమాచార సాంకేతికత వంటి కీలక అంశాలపై అవగాహన కల్పిస్తున్నారు. సీనియర్ అధికారులు , విషయ నిపుణులు ఆచరణాత్మక డిపో-స్థాయి నిర్వహణపై దృష్టి సారిస్తూ, తనిఖీ విధానాలు, రికార్డుల నిర్వహణ, ఆర్థిక లావాదేవీలు, లోపాల గుర్తింపు , నివారణ చర్యల గురించి వివరిస్తున్నారు. ఆర్థిక క్రమశిక్షణను బలోపేతం చేయడం, సాంకేతిక అవకతవకలను అరికట్టడం ,సమర్థవంతమైన నిర్వహణకు అవసరమైన జ్ఞానం, నైపుణ్యాలతో డిపో మేనేజర్లను సన్నద్ధం చేయడం ఈ కార్యక్రమం లక్ష్యమని బ్రహ్మానంద రెడ్డి అన్నారు.