ముంబై : భారత రిజర్వ్ బ్యాంక్ ఆఫ్ ఇండియా (ఆర్బీఐ) కీలక ప్రకటన చేసింది. బ్యాంకింగ్ వ్యవస్థలోకి రూ. 72,300 కోట్లను ప్రవేశ పెట్టింది. ముందస్తు పన్ను చెల్లింపుల కారణంగా వ్యవస్థలో మిగులు నగదు లభ్యత తగ్గిన నేపథ్యంలో ఆర్బీఐ బుధవారం రెండు ‘వేరియబుల్ రేట్ రెపో’ వేలంపాటల ద్వారా బ్యాంకింగ్ వ్యవస్థలోకితాత్కాలిక నగదును ప్రవేశ పెట్టింది. కేంద్ర బ్యాంక్ 5.26 శాతం కట్-ఆఫ్ రేటుతో రెండు రోజుల వీఆర్ఆర్ వేలం ద్వారా రూ. 50,016 కోట్లను, అలాగే మరో రెండు రోజుల వీఆర్ఆర్ వేలం ద్వారా రూ. 22,284 కోట్లను వ్యవస్థలోకి విడుదల చేసింది. బ్యాంకింగ్ వ్యవస్థలో నగదు లభ్యతలో తలెత్తే అసమతుల్యతలను నిర్వహించడానికి ఆర్బీఐ ఈ వేరియబుల్ రేట్ రెపో వేలంపాటలను ఉపయోగిస్తుంది.
ఆర్బీఐ గణాంకాల ప్రకారం, జూన్ 16 నాటికి బ్యాంకింగ్ వ్యవస్థలో సుమారు రూ. 23,881.21 కోట్ల మిగులు నగదు ఉన్నట్లు అంచనా. ఇది జూన్ 15 నాటి సుమారు రూ. 1.51 లక్షల కోట్ల మిగులుతో పోలిస్తే తక్కువ. ముందస్తు పన్ను చెల్లింపుల కారణంగా నగదు బయటకు వెళ్లడమే ఈ మిగులు తగ్గడానికి కారణమని నిపుణులు పేర్కొన్నారు. అంతేకాకుండా, బ్యాంకింగ్ వ్యవస్థలో నగదు లభ్యతకు మద్దతుగా రాబోయే రోజుల్లో కేంద్ర బ్యాంక్ మరిన్ని వీఆర్ఆర్ వేలం పాటలను నిర్వహించవచ్చని వారు తెలిపారు. బ్యాంకింగ్ వ్యవస్థలో మిగులు నగదు తగ్గడం , వస్తు సేవల పన్ను చెల్లింపుల కారణంగా మరింత నగదు బయటకు వెళ్లే అవకాశం ఉన్నందున, నగదు లభ్యతకు మద్దతు ఇవ్వడానికి, ఓవర్నైట్ వడ్డీ రేట్లను అదుపులో ఉంచడానికి కేంద్ర బ్యాంక్ మరిన్ని వేరియబుల్ రేట్ రెపో వేలం పాటలను నిర్వహించవచ్చు అని కరూర్ వైశ్యా బ్యాంక్ ట్రెజరీ విభాగం అధిపతి వి. రామచంద్ర రెడ్డి అన్నారు.