చెన్నై : తమిళనాడు టీవీకే ప్రభుత్వం నూతన బడ్జెట్ లో తాము ప్రకటించిన మేనమామ బంగారు పథకం కోసం భారీ ఎత్తున నిధులను కేటాయించింది. దీని పేరు తాయ్ మామన్ తంగ మోతిరం పథకం కింద, ప్రభుత్వ ఆసుపత్రుల్లో జన్మించే ప్రతి శిశువుకు 1 గ్రాము బంగారు ఉంగరాన్ని రూ. 560 కోట్ల వ్యయంతో అందజేస్తారు. ఈ ఏడాది జరిగిన అసెంబ్లీ ఎన్నికలకు ముందు ఇచ్చిన హామీని నెరవేర్చేందుకు, లబ్ధిదారులకు బంగారు నాణెం, ఉంగరం , పాడి ఆవులను బహుమతులుగా అందించడానికి ముఖ్యమంత్రి సి. జోసెఫ్ విజయ్ నేతృత్వంలోని టీవీకే ప్రభుత్వం బుధవారం రూ. 1,000 కోట్లకు పైగా నిధులను కేటాయించింది. టీవీకే ప్రభుత్వం ప్రవేశ పెట్టిన తొలి బడ్జెట్లో తమిళనాడులోని ప్రతి మహిళకు ముఖ్యమంత్రి ఒక అన్నగా లేదా తమ్ముడిగా అండగా నిలుస్తారని ఆర్థిక మంత్రి ఎన్. మేరీ విల్సన్ పేర్కొన్నారు.
వివాహం అనేది ఒక మహిళ జీవితంలో అత్యంత ఆనందకరమైన సందర్భాలలో ఒకటి. తమిళనాడులోని ప్రతి మహిళను తన కుటుంబ సభ్యురాలిగా భావించే మా ముఖ్యమంత్రి, వారి వివాహ వేడుక రోజున ‘అన్నన్ సీర్’ (అన్నయ్య ఇచ్చే కానుక)గా ఎనిమిది గ్రాముల బంగారు నాణెం , పట్టు చీరను బహుమతిగా అందిస్తారు. సవరించిన బడ్జెట్ అంచనాలలో ఈ పథకం కోసం రూ. 812 కోట్లు కేటాయిస్తామన్నారు. తాయ్ మామన్ తంగ మోతిరం పథకం కింద ప్రభుత్వ ఆసుపత్రుల్లో జన్మించే ప్రతి శిశువుకు 1 గ్రాము బంగారు ఉంగరాన్ని రూ. 560 కోట్ల వ్యయంతో అందజేస్తారు. ఈ పథకం గురించి వివరిస్తూ, తల్లీబిడ్డల ఆరోగ్యం తమిళనాడు ప్రజా ఆరోగ్య వ్యవస్థలో కీలకమైన అంశమని విల్సన్ తెలిపారు. ఇటీవలి ‘నేషనల్ శాంపిల్ రిజిస్ట్రేషన్ సిస్టమ్’ సర్వే ప్రకారం, తమిళనాడులో శిశు మరణాల రేటు ప్రతి 1,000 సజీవ జననాలకు 11గా ఉందని తెలిపారు. ఇది దేశంలోనే అత్యల్ప స్థాయిలలో ఒకటి కాగా, ప్రభుత్వం ప్రజా ఆరోగ్య పథకాలను నిరంతరం అమలు చేయడం వల్లే ఇది సాధ్యమైంది అని అన్నారు.