RBI : రిజర్వ్ బ్యాంక్ ఆఫ్ ఇండియా (ఆర్బీఐ) చెలామణి నుంచి తీసేసిన రూ.2,000 నోట్లకు సంబంధించి తాజా అప్డేట్ను విడుదల చేసింది. రెండు సంవత్సరాల క్రితమే వినియోగం నుంచి ఉపసంహరించినప్పటికీ, ఇప్పటికీ ప్రజల వద్ద సుమారు రూ.6,017 కోట్ల విలువైన రూ.2వేల నోట్లు మిగిలి ఉన్నట్టు ఆర్బీఐ తెలిపింది.
2023 మే 19న ఆర్బీఐ (RBI) ఈ నోట్లను అధికారికంగా చెలామణి నుంచి ఉపసంహరించనున్నట్లు ప్రకటించింది. ఆ తేదీ నాటికి మార్కెట్లో ఉన్న మొత్తం రూ.2వేల నోట్ల విలువ రూ.3.56 లక్షల కోట్లు కాగా, 2025 జూలై 31 నాటికి అందులో 98.31 శాతం తిరిగి వచ్చాయని, ఇంకా 1.69 శాతం ప్రజల వద్దే మిగిలి ఉన్నట్లు వెల్లడించింది.
RBI – రూ.2వేల నోట్లు చెల్లుబాటు అవుతాయా?
ఆర్బీఐ స్పష్టంగా పేర్కొన్న ప్రకారం, ప్రస్తుతం కూడా రూ.2వేల నోట్లు చట్టబద్ధంగా చెల్లుబాటు అయ్యే కరెన్సీగానే కొనసాగుతున్నాయి. వాటిని మార్పిడి చేసుకునే అవకాశం ఇంకా ఉంది.
ఎక్కడ మార్చుకోవచ్చు?
ప్రజలు తమ వద్ద ఉన్న రూ.2వేల నోట్లను ఆర్బీఐ (RBI) 19 ఇష్యూ కార్యాలయాల ద్వారా తమ బ్యాంకు ఖాతాల్లో జమ చేసుకోవచ్చు. లేదా ఇండియా పోస్టు ద్వారా పంపించేందుకు అవకాశం ఉంది.
ఈ కార్యాలయాలు ఈ కింది నగరాల్లో ఉన్నాయి:
అహ్మదాబాద్, బెంగళూరు, బేలాపూర్, భోపాల్, భువనేశ్వర్, చండీగఢ్, చెన్నై, గౌహతి, హైదరాబాద్, జైపూర్, జమ్మూ, కాన్పూర్, కోల్కతా, లక్నో, ముంబై, నాగ్పూర్, న్యూఢిల్లీ, పాట్నా, తిరువనంతపురం.
2023 అక్టోబర్ 9 నుంచి ఈ విధానం కొనసాగుతోంది. వ్యక్తిగతులు లేదా సంస్థలు తాము పంపిన రూ.2వేల నోట్లను బ్యాంకు ఖాతాల్లో జమ చేసుకునే వెసులుబాటు కల్పించారు.
నోట్ల వెనుకటి చరిత్ర
2016 నవంబర్లో కేంద్ర ప్రభుత్వం అకస్మాత్తుగా పాత రూ.500, రూ.1,000 నోట్లను రద్దు చేసిన నేపథ్యంలో, ఆర్థిక వ్యవస్థలో తాత్కాలికంగా నగదు లభ్యతను పెంచేందుకు రూ.2వేల నోటును తొలిసారి ప్రవేశపెట్టింది. అయితే, 2018-19 తర్వాత ఈ నోట్ల ముద్రణను ఆర్పివేసింది. అప్పటికే ప్రజల వద్ద లావాదేవీల్లో ఈ నోటు వినియోగం తగ్గిపోతూ వచ్చింది. చాలా వరకు ఈ నోట్ల ముద్రణ 2017 మార్చి నాటికి ముగిసింది. వాటి జీవితకాలం ముగిసిన నేపథ్యంలో ఆర్బీఐ వీటి ఉపసంహరణ ప్రక్రియ చేపట్టింది.
ఇప్పటికీ ప్రజల వద్ద రూ.6,000 కోట్లకు పైగా రూ.2వేల నోట్లు ఉండటం, వాటిని తిరిగి బ్యాంకుల్లో జమ చేయకుండా నిల్వ ఉంచడంపై ఆర్బీఐ ఆందోళన వ్యక్తం చేస్తోంది. తక్షణమే వాటిని బ్యాంకు ఖాతాల్లో జమ చేయాలని సూచిస్తోంది. లావాదేవీల్లో ఇకపై ఈ నోటు స్థానాన్ని ఇతర చిన్న విలువల నోట్లు భర్తీ చేసిన విషయం తెలిసిందే.
Also Read : Sensex Fall Sensational : ట్రంప్ సుంకాలతో 2వ రోజు కూడా నష్టాల్లో భారత సూచీలు