న్యూఢిల్లీ : రిజ‌ర్వ్ బ్యాంక్ ఆఫ్ ఇండియా (ఆర్బీఐ) సంచలన నిర్ణయం తీసుకుంది. ఇప్ప‌టికే ఆర్థిక అంశాలపై వినియోగ‌దారులు, ఖాతాదారుల‌కు అవగాహ‌న క‌ల్పించే ప్ర‌య‌త్నం చేస్తోంది. తాజాగా ఆర్బీఐ సంవాద్ 2026 పేరుతో సదస్సు నిర్వ‌హిస్తోంది. ఇందులో ద్రవ్య విధానం, కృత్రిమ మేధ , ఆర్థిక స్థిరత్వంపై దృష్టి సారించింది. ప్ర‌ధానంగా ప్ర‌స్తుతం ప్రపంచ ఆర్థిక వ్యవస్థ ఎదుర్కొంటున్న సవాళ్లు , అవకాశాలపై చర్చించేందుకు ప్రపంచ వ్యాప్తంగా ఉన్న సెంట్రల్ బ్యాంక్ గవర్నర్లు, విధానకర్తలు, అంతర్జాతీయ సంస్థల ప్రతినిధులు, నిపుణులు ఈ రెండు రోజుల సదస్సులో పాల్గొంటున్నారు. న్యూఢిల్లీలో జరిగిన ఈ అంతర్జాతీయ సదస్సును ఆర్బీఐ గవర్నర్ సంజయ్ మల్హోత్రా ప్రారంభించగా, కేంద్ర ఆర్థిక , కార్పొరేట్ వ్యవహారాల శాఖ మంత్రి నిర్మలా సీతారామన్ ముఖ్య అతిథిగా ప్రసంగించారు. ఈ సదస్సులో ద్రవ్య విధానం, ఆర్థిక రంగంలో కృత్రిమ మేధ పాత్ర, ఆర్థిక సమ్మిళితత్వం, ఆర్థిక స్థిరత్వం , చెల్లింపు వ్యవస్థల పరిణామం వంటి కీలక అంశాలపై చర్చలు జరిగాయి.
వేగంగా మారుతున్న ఆర్థిక , సాంకేతిక పరిస్థితుల నేపథ్యంలో, సెంట్రల్ బ్యాంకులు, విధానకర్తల మధ్య సమన్వయాన్ని, సహకారాన్ని పెంపొందించడమే ఈ సదస్సు ప్రధాన ఉద్దేశ్యం అని స్ప‌ష్టం చేశారు కేంద్ర మంత్రి. ఆర్థిక వ్యవస్థలను బలోపేతం చేయడం, సమ్మిళిత వృద్ధిని ప్రోత్సహించడం, ఆర్థిక సేవల సామర్థ్యాన్ని మెరుగు పరిచేందుకు సాంకేతికతను ఎలా ఉపయోగించు కోవాలో పాల్గొనేవారు చర్చించారు. ప్ర‌ధానంగా మారుతున్న ఆర్థిక పరిస్థితులు , ఆర్థిక రంగంలో వేగంగా జరుగుతున్న డిజిటల్ పరివర్తన నేపథ్యంలో ప్రపంచ వ్యాప్తంగా ఉన్న సెంట్రల్ బ్యాంకులకు అత్యంత ప్రాధాన్యత సంతరించుకున్న అంశాలపై తమ అనుభవాలను, ఉత్తమ పద్ధతులను పంచుకోవడానికి ఈ సదస్సు ఒక వేదికగా నిలిచిందని ఆర్బీఐ తెలిపింది. బహుపాక్షిక అభివృద్ధి సంస్థల ప్రతినిధులు, నియంత్రణ సంస్థల అధికారులు , ఆర్థిక సేవల రంగానికి చెందిన ప్రముఖ నాయకులు పాల్గొన్నారని పేర్కొన్నారు.
