PM Modi : ఈ దీపావళిని పురస్కరించుకొని సామాన్యులపై ఉన్న ధరల భారం తగ్గించేందుకు కేంద్ర ప్రభుత్వం కీలక నిర్ణయాలు తీసుకోనున్నట్లు సమాచారం. ప్రధానమంత్రి నరేంద్ర మోదీ (PM Modi) నేతృత్వంలో ప్రభుత్వం ప్రయోజనకరమైన నిర్ణయాలను తీసుకునేందుకు ప్రణాళికలు సిద్ధం చేస్తోంది.
ఇప్పటివరకు పండుగ కాలంలో నిత్యావసర వస్తువుల ధరలు పెరగడం సాధారణంగా కనిపించినప్పటికీ, ఈసారి పరిస్థితి భిన్నంగా ఉండనుంది. గోధుమలు, శనగలు, పప్పులు, వంట నూనె వంటి అవసరమైన వస్తువులపై ధరలు తగ్గే అవకాశముందని అధికార వర్గాలు సూచిస్తున్నాయి. దీని ద్వారా సామాన్యులకు గణనీయమైన ఉపశమనం లభించనుంది.
PM Modi – జీఎస్టీ కొత్త శ్లాబుల రూపకల్పన
కేంద్రం ప్రతిపాదిస్తున్న కొత్త పన్ను విధానంలో జీఎస్టీ (GST) రెండు ప్రధాన శ్లాబులుగా — 5 శాతం మరియు 18 శాతంగా మారనుంది. ఇందులో భాగంగా, కొన్ని ముఖ్యమైన వినియోగ వస్తువులపై పన్ను రేట్లు తగ్గే అవకాశం ఉంది:
- జీవిత, ఆరోగ్య బీమా ప్రీమియాలు,
- మందులు, టూత్ బ్రష్లు, హెయిర్ ఆయిల్లు
ఇవన్నీ పన్ను మినహాయింపు లేదా 5 శాతం శ్రేణిలోకి మారవచ్చు.
ఇకపోతే,
- టీవీలు, ఎయిర్ కండిషనర్లు, ఫ్రిజ్లు వంటి వస్తువులు 28 శాతం నుంచి 18 శాతంకి తగ్గే అవకాశం ఉంది.
- పొగాకు ఉత్పత్తులు, సిగరెట్లు వంటి ఆరోగ్యహానికర వస్తువులపై మాత్రం పన్ను భారం పెరిగే అవకాశముంది.
వాహనాలపై పన్ను తగ్గింపు ప్రతిపాదనలు
ప్రస్తుతం 28 శాతం పన్ను విధించబడుతున్న చిన్న కార్లు, హైబ్రిడ్ వాహనాలు, ద్విచక్ర వాహనాలపై పన్ను 18 శాతానికి తగ్గించేందుకు కేంద్రం యోచిస్తోంది. ఇది వాహన రంగానికి ఊతమిచ్చి, అమ్మకాలు 15 నుంచి 20 శాతం వరకు పెరగవచ్చని పరిశ్రమ వర్గాలు అంచనా వేస్తున్నాయి.
అధిక ఇంజిన్ సామర్థ్యం కలిగిన వాహనాలపై ప్రస్తుతం 28 శాతం జీఎస్టీతో (GST) పాటు 22 శాతం అదనపు పన్ను ఉంటుంది. మొత్తం 50 శాతం పన్ను భారం ఉంటోంది. దీన్ని 40–43 శాతం పరిధిలోకి తగ్గించే దిశగా కేంద్రం పరిశీలన చేస్తోంది.
ఇతర రంగాలపై ప్రభావం
- ఆహార పదార్థాలు, స్టేషనరీ, విద్యా పరికరాలు, టూత్ బ్రష్లు, హెయిర్ ఆయిల్లు వంటి వినియోగ వస్తువులు జీరో లేదా 5 శాతం పన్ను శ్రేణిలోకి మారే అవకాశముంది.
- చెప్పులు, బూట్లు, సిమెంట్, ఎరువులు, వ్యవసాయ ఉత్పత్తులు, హస్తకళల ఉత్పత్తులు వంటి రంగాలపై కూడా ప్రభుత్వం ప్రత్యేక దృష్టి పెట్టనుంది.
ట్రాక్టర్లపై పన్ను తగ్గింపు
ప్రస్తుతం 12 శాతం పన్ను ఉన్న ట్రాక్టర్లపై, 5 శాతం శ్రేణిలోకి మారే అవకాశముందని ఆర్థిక విశ్లేషణ సంస్థలు అంచనా వేస్తున్నాయి. దీని ద్వారా వ్యవసాయ రంగానికి ఊతమివ్వగలమని నిపుణులు భావిస్తున్నారు.
రెండు శ్లాబుల విధానంతో సమగ్ర మార్పులు
- ప్రస్తుతం 12 శాతం శ్రేణిలో ఉన్న 99 శాతం వస్తువులు 5 శాతానికి మారవచ్చు.
- 28 శాతం శ్రేణిలో ఉన్న 90 శాతం వస్తువులు 18 శాతానికి మారే అవకాశం ఉంది.
- అత్యంత విలాస వస్తువులైన 5 నుంచి 7 వస్తువులు మాత్రమే 40 శాతం పన్ను శ్రేణిలో కొనసాగుతాయి.
పన్ను ఆదాయంలో పెరుగుదల
ఈ పన్ను మార్పుల ద్వారా ప్రజలకు ఉపశమనం కలిగించడమే కాకుండా, పన్ను ఆదాయం కూడా ప్రభావితమవకుండా ఉండేలా కేంద్రం ప్రణాళిక వేస్తోంది. గత మూడు సంవత్సరాల్లో నెలవారీ జీఎస్టీ వసూళ్లు రూ.1.51 లక్షల కోట్ల నుంచి రూ.1.84 లక్షల కోట్లకు పెరిగినట్టు గణాంకాలు సూచిస్తున్నాయి.
Also Read : Trump Tarrifs Strong Impact : ట్రంప్ సుంకాల కారణంగా 4 లక్షల కోట్ల భారత వస్తువులపై భారం