NHAI : ప్రజలు హైవేలపై ఉన్న పబ్లిక్ టాయిలెట్లను ఉపయోగించడంలో వెనుకంజ వేయడానికి ప్రధాన కారణం అవి శుభ్రంగా లేకపోవడమే. ఈ సమస్యను దృష్టిలో ఉంచుకుని నేషనల్ హైవే అథారిటీ ఆఫ్ ఇండియా (NHAI) స్వచ్ఛ భారత్ అభియాన్ భాగంగా వినూత్న కార్యక్రమాన్ని ప్రారంభించింది.
ఈ చొరవ ప్రకారం, ప్రయాణికుడు హైవేపై మురికిగా ఉన్న పబ్లిక్ టాయిలెట్ను గమనించి ఎన్హెచ్ఏఐకి ఫిర్యాదు చేస్తే, ఆ వ్యక్తికి ₹1,000 బహుమతి లభిస్తుంది. ఈ బహుమతి FASTag రీఛార్జ్ రూపంలో అందజేయబడుతుంది. ఈ పథకం అక్టోబర్ 31, 2025 వరకు దేశవ్యాప్తంగా అమల్లో ఉంటుంది.
NHAI – ప్రధాన లక్ష్యం:
హైవేలపై ప్రయాణికులకు మెరుగైన పారిశుధ్య సౌకర్యాలు అందించడం, ప్రజల్లో పరిశుభ్రతపై అవగాహన పెంచడం. ప్రతి ఫిర్యాదు AI మరియు మాన్యువల్ ధృవీకరణ ద్వారా పరిశీలించబడుతుంది.
ఫిర్యాదు చేసే విధానం:
- మీ ఫోన్లో RajmargYatra యాప్ తాజా వెర్షన్ డౌన్లోడ్ చేసుకోండి.
- మురికిగా ఉన్న టాయిలెట్ ఫోటోను తేదీ, సమయంతో పాటు క్లియర్గా తీయాలి.
- ఆ ఫోటోను యాప్లో అప్లోడ్ చేసి, మీ పేరు, వాహన రిజిస్ట్రేషన్ నంబర్, ఖచ్చితమైన స్థానం, మొబైల్ నంబర్ నమోదు చేయాలి.
- ఫిర్యాదు ధృవీకరించబడిన తర్వాత ఎన్హెచ్ఏఐ మీ FASTag ఖాతాలో ₹1,000 రీఛార్జ్ చేస్తుంది.
బహుమతి వర్తించని సందర్భాలు:
- ఈ పథకం ఎన్హెచ్ఏఐ నిర్మించిన, నిర్వహిస్తున్న టాయిలెట్లకు మాత్రమే వర్తిస్తుంది.
- పెట్రోల్ బంకులు, రెస్టారెంట్లు లేదా ఇతర ప్రైవేట్ సౌకర్యాల వద్ద ఉన్న టాయిలెట్లకు ఇది వర్తించదు.
- ప్రతి వాహన రిజిస్ట్రేషన్ నంబర్ (VRN)కు ఒకే రివార్డు మాత్రమే లభిస్తుంది.
- ఒకే టాయిలెట్పై అనేక మంది ఫిర్యాదు చేస్తే, మొదట సరిగ్గా ఫిర్యాదు చేసిన వ్యక్తికి మాత్రమే బహుమతి లభిస్తుంది.
- ఫోటో తప్పనిసరిగా ఒరిజినల్గా యాప్ ద్వారా తీసినదే కావాలి. పాత లేదా నకిలీ ఫోటోలు తిరస్కరించబడతాయి.
ఈ చొరవ ద్వారా హైవేలపై పరిశుభ్రత మెరుగవుతుందని, ప్రయాణికులు పబ్లిక్ టాయిలెట్లను ధైర్యంగా ఉపయోగించగలరని NHAI అధికారులు తెలిపారు.
Also Read : Rupee Fall Sensational : డాలర్ బలంతో రూపాయి బలహీనత – 9 పైసలు క్షీణించి ₹88.77 వద్ద ట్రేడింగ్