న్యూఢిల్లీ : నెస్లే ఇండియా కీలక ప్రకటన చేసింది. మాగీలో పురుగులు, కలుషితాలు ఉన్నాయన్న ఆరోపణలను కంపెనీ ఖండించింది. తమ ఉత్పత్తులు అన్ని నాణ్యత , ఆహార భద్రతా ప్రమాణాలకు అనుగుణంగా ఉన్నాయని నెస్లే ఇండియా పేర్కొంది. తయారీ ప్రక్రియలో కఠినమైన నాణ్యత మరియు ఆహార భద్రతా ప్రమాణాలను పాటిస్తున్నట్లు సంస్థ స్పష్టం చేసింది. సోషల్ మీడియాలో మాగీ నూడుల్స్లో పురుగులు లేదా కలుషితాలు ఉన్నాయని జరుగుతున్న ప్రచారాన్ని ఈ ప్రముఖ ఎఫ్ఎంసిజి సంస్థ ఖండించింది. సంబంధిత బ్యాచ్ , మార్కెట్ నమూనాలపై నిర్వహించిన ప్రయోగశాల పరీక్షల్లో ఉత్పత్తులు అన్ని ప్రమాణాలకు అనుగుణంగా ఉన్నట్లు నిర్ధారణ అయిందని సంస్థ తెలిపింది. ఎక్స్ ప్లాట్ఫారమ్లోని ఒక ధృవీకరించబడని ఖాతా ద్వారా లేవనెత్తిన ఆందోళనల నేపథ్యంలో, భారత ఆహార భద్రత , ప్రమాణాల అథారిటీ (FSSAI) ద్వారా తమకు ఈ ఫిర్యాదు గురించి సమాచారం అందిందని స్టాక్ ఎక్స్ఛేంజీలకు ఇచ్చిన వివరణలో కంపెనీ పేర్కొంది.
జూన్ 12న ప్రచురితమైన మీడియా నివేదికపై ఎన్ఎస్ఈ, బీఎస్ఈ అడిగిన ప్రశ్నకు సమాధానంగా, మాగీ నూడుల్స్లో పురుగులు లేదా కలుషితాలు ఉన్నాయని ధృవీకరించబడని ఖాతా ఆధారంగా మీడియాలో జరుగుతున్న ప్రచారాన్ని తాము పూర్తిగా ఖండిస్తున్నామని నెస్లే ఇండియా తెలిపింది. ఫిర్యాదుదారు నుండి పరిశీలన కోసం ఎటువంటి నమూనా ఇంకా అందలేదని, అలాగే ఆ సోషల్ మీడియా ఖాతా అందుబాటులో లేకపోవడంతో వారి నుండి ఎటువంటి స్పందన రాలేదని కంపెనీ పేర్కొంది. ప్రామాణిక విధానంలో భాగంగా, అదే బ్యాచ్కు చెందిన రిఫరెన్స్ నమూనాను స్వతంత్ర, FSSAI-గుర్తింపు పొందిన మరియు ఎన్ఏబీఎల్-అక్రిడిటేషన్ కలిగిన ప్రయోగశాలకు పరీక్ష కోసం పంపించినట్లు తెలిపింది.