బెంగళూరు : కర్ణాటక మంత్రివర్గంలో చేరబోతున్నారు కాంగ్రెస్ ఎమ్మెల్యే మధు బంగారప్ప. ఈ సందర్బంగా ఆయన ఇవాళ స్పందించారు. నాకు ఈ అవకాశం కల్పించినందుకు నేను చాలా సంతోషంగా ఉన్నాను. నన్ను రెండోసారి పరిగణనలోకి తీసుకున్నందుకు పార్టీ అధిష్టానానికి కృతజ్ఞతలు తెలియ జేస్తున్నాను. డి.కె. శివకుమార్ నాయకత్వానికి, అలాగే సిద్ధరామయ్య కి కూడా నా ధన్యవాదాలు. ఎందుకంటే వారి అనుభవం, మార్గదర్శకత్వంలో నేను పనిచేశాను. పార్టీ అధ్యక్షులు డి.కె. శివకుమార్కి, అలాగే నన్ను పరిగణనలోకి తీసుకున్న అధిష్టానానికి , సీనియర్ నాయకులందరికీ కృతజ్ఞతలు. ప్రస్తుత పరిస్థితి మరింత సవాలుతో కూడుకున్నదని నేను భావిస్తున్నాను. గతంలో వారు నాకు ఇచ్చిన గౌరవం , బాధ్యత ఇప్పుడు మరింత గొప్ప నమ్మకంగా మారాయి. ఆ నమ్మకాన్ని నిలబెట్టుకోవాల్సిన బాధ్యత మాపై ఉంది, అందుకే తాను గతంలో కంటే మరింత కష్టపడి పని చేస్తానని ప్రకటించారు మధు బంగారప్ప.
ఇదిలా ఉండగా సిద్ధరామయ్య నేతృత్వంలోని గత మంత్రివర్గంలో పాఠశాల విద్యా శాఖ మంత్రిగా పనిచేసిన సొరబ్ ఎమ్మెల్యే మధు బంగారప్పకు మళ్లీ మంత్రివర్గంలో చోటు దక్కింది. దీనివల్ల శివమొగ్గ జిల్లాకు చెందిన ఇతర ఆశావహులు నిరాశకు గురయ్యారు.మాజీ ముఖ్యమంత్రి ఎస్. బంగారప్ప ప్రాతినిధ్యం వహించి, తీర్చిదిద్దిన సొరబ్ నియోజకవర్గం నుండి రెండుసార్లు ఎమ్మెల్యేగా ఎన్నికైన మధు బంగారప్ప, గతంలో మూడేళ్లపాటు శివమొగ్గ జిల్లా ఇన్ఛార్జ్ మంత్రిగా కూడా పనిచేశారు. ముఖ్యమంత్రి పదవిలో మార్పు వచ్చినప్పటికీ, తన మంత్రి పదవిని నిలబెట్టుకుంటాననే ధీమాతో ఆయన ఉన్నారు.
అయితే, పార్టీ కార్యకర్తలలో ఒక వర్గం సాగర్ ఎమ్మెల్యే బేలూరు గోపాలకృష్ణకు మద్దతు తెలిపింది. వారిలో చాలామంది బహిరంగ సమావేశాలు నిర్వహించి, మీడియా ముందు తమ నాయకుడికి మంత్రి పదవి ఇవ్వాలని డిమాండ్ చేశారు. గోపాలకృష్ణ కూడా బహిరంగంగానే తాను ఆ పదవికి పోటీదారునని ప్రకటించుకున్నారు. అంతేకాకుండా, మంత్రివర్గ పునర్వ్యవస్థీకరణ కోసం పార్టీ అధిష్టానంపై ఒత్తిడి తెచ్చేందుకు ఎమ్మెల్యేల బృందానికి నాయకత్వం వహించారు.