India Forex Reserves : దేశం 79వ స్వాతంత్ర్య దినోత్సవ వేడుకలు జరుపుకుంటున్న సందర్భంలో, ఆర్థిక రంగానికి ఉత్సాహం నింపే శుభవార్త వెలుగులోకి వచ్చింది. దేశ విదేశీ మారక ద్రవ్య నిల్వల్లో గణనీయమైన వృద్ధి నమోదైంది. ఆగస్టు 8, 2025తో ముగిసిన వారంలో భారత విదేశీ మారక ద్రవ్య నిల్వలు 4.747 బిలియన్ డాలర్లు పెరిగాయి. తాజా వృద్ధితో కలిపి మొత్తం నిల్వలు 693.618 బిలియన్ డాలర్లకు చేరినట్లు భారత రిజర్వ్ బ్యాంక్ (RBI) శుక్రవారం విడుదల చేసిన వారపు నివేదికలో పేర్కొంది.
గత వారం, అంటే ఆగస్టు 1తో ముగిసిన వారంలో, విదేశీ మారక నిల్వలు 9.322 బిలియన్ డాలర్లు తగ్గిన నేపథ్యంలో, తాజా పెరుగుదల కొంత ఉపశమనం కలిగించే అంశంగా భావించబడుతోంది. సెప్టెంబర్ 27, 2024 నాటికి నమోదైన 704.885 బిలియన్ డాలర్ల గరిష్ఠ స్థాయికి ఇది మరింత దగ్గరగా ఉన్న పరిస్థితి.
India Forex Reserves – విదేశీ కరెన్సీ ఆస్తుల్లో పెరుగుదల
ఆగస్టు 8తో ముగిసిన వారంలో, భారతదేశ విదేశీ కరెన్సీ ఆస్తులు (FCA) 2.372 బిలియన్ డాలర్లు పెరిగి, మొత్తం 583.979 బిలియన్ డాలర్లకు చేరాయి. గత వారం ఇదే అంశంలో 7.319 బిలియన్ డాలర్ల తగ్గుదల నమోదైంది. విదేశీ కరెన్సీ ఆస్తులు మొత్తం విదేశీ మారక నిల్వల్లో కీలక భాగం. యూఎస్ డాలర్లతో పాటు యూరో, పౌండ్, యెన్ లాంటి ఇతర కరెన్సీల మార్పిడి విలువల ప్రభావం కూడా వీటిపై ఉంటుంది.
రూపాయి మారక విలువ స్థిరంగా ఉంచేందుకు, రిజర్వ్ బ్యాంక్ (RBI) అవసరమైన సమయంలో విదేశీ మారక ద్రవ్యాలను కొనుగోలు చేయడం లేదా అమ్మడం ద్వారా జోక్యం చేసుకుంటుంది. రూపాయి బలహీనపడినపుడు అమ్మకాలు, బలపడినపుడు కొనుగోళ్ల ద్వారా మారక విలువకు మద్దతునిస్తుంది.
బంగారు నిల్వల్లో వృద్ధి
గత వారంలో బంగారు నిల్వల్లో 2.162 బిలియన్ డాలర్ల పెరుగుదల నమోదై, మొత్తం నిల్వలు 86.160 బిలియన్ డాలర్లకు చేరుకున్నట్లు రిజర్వ్ బ్యాంక్ (RBI) వెల్లడించింది. ఇదే సమయంలో గత వారం 1.706 బిలియన్ డాలర్ల తగ్గుదల నమోదైన విషయం గమనార్హం.
SDR మరియు IMF నిల్వల్లో పెరుగుదల
ఆగస్టు 8తో ముగిసిన వారంలో భారతదేశ స్పెషల్ డ్రాయింగ్ రైట్స్ (SDR) 169 మిలియన్ డాలర్లు పెరిగి, 18.741 బిలియన్ డాలర్లకు చేరాయి. అంతేగాక, అంతర్జాతీయ ద్రవ్య నిధి (IMF) వద్ద ఉన్న రిజర్వ్ స్థాయిలో కూడా 45 మిలియన్ డాలర్ల వృద్ధి కనిపించి, ఇప్పుడు 4.739 బిలియన్ డాలర్లకు చేరింది.
దేశ ఆర్థిక స్థితిగతుల పరంగా, విదేశీ మారక నిల్వల్లో ఇలా వృద్ధి నమోదు కావడం విశేషమైన పరిణామం. దీనివల్ల దేశానికి అంతర్జాతీయ మార్కెట్లలో ఆర్థిక స్థిరత్వం, నమ్మకాన్ని పెంచే అవకాశముంది. భవిష్యత్ ఆర్థిక వ్యూహాల అమలుకు ఇది అనుకూలంగా మారనుంది.
Also Read : Today Gold Price : రోజురోజుకు తగ్గుతూ వస్తున్న పరుగులుతీసే పసిడి ధరలు