అమెరికా : ప్ర‌పంచ టెక్ దిగ్గ‌జ సంస్థ గూగూల్ ఫేక్ మెస్సేజ్ ల‌తో పాటు లింకులపై దృష్టి సారించింది. ప్ర‌త్యేకించి గూగుల్ మెస్సేజెస్ యాప్ లో మోసపూరిత సందేశాలను , ప్రమాదకరమైన లింక్‌లను గుర్తించేందుకు ఏఐ ఆధారిత ఫీచర్‌ను పరీక్షిస్తున్నారు. నకిలీ సందేశాలను గుర్తించడానికి గూగుల్ మెస్సేజెస్ ఇప్పుడు జెమిని ఏఐని ఉప‌యోగిస్తోంది ప్ర‌యోగాత్మ‌కంగా. ఏదైనా సంభాషణ లేదా లింక్ ప్రమాదకరంగా ఉండవచ్చని వినియోగదారులకు తెలియ జేయడం ద్వారా, వారు మోసపోకుండా ముందే జాగ్రత్త పడేందుకు ఇది సహాయ పడుతుంది. ఉదాహరణకు పార్శిల్ డెలివరీ కోసం డబ్బు చెల్లించమని లేదా బ్యాంక్ కేవైసీ అప్‌డేట్ చేయమని వచ్చే సందేశాలు చాలా అసలైనవిగా అనిపించవచ్చు. వీటిని చూసి చాలామంది డెలివరీ సంస్థ లేదా బ్యాంక్ నుండి వచ్చిన అధికారిక సందేశాలు అని పొరబడవచ్చు. కానీ, ఇవి నిజానికి డబ్బును లేదా వ్యక్తిగత సమాచారాన్ని దొంగిలించడానికి చేసే మోసపూరిత ప్రయత్నాలు కావచ్చు. ఇలాంటి ముప్పులను వినియోగదారులు గుర్తించేలా చేయడానికి గూగుల్ ఒక కొత్త పద్ధతిని సిద్ధం చేస్తోంది.
గూగుల్ మెస్సేజెస్ యాప్ లో మెరుగైన రక్షణ అనే ఫీచర్‌ను పరీక్షిస్తోంది; ఇది జెమిని ఏఐని ఉపయోగించి సంభాషణల్లోని మోసాలను పసిగడుతుంది. తెలియని వ్యక్తుల నుండి వచ్చే ప్రమాదకరమైన లింక్‌లను పరిశీలిస్తుంది. ఈ ఫీచర్ కేవలం ఒక్క సందేశాన్ని మాత్రమే కాకుండా, మొత్తం సంభాషణను విశ్లేషిస్తుంది. మోసగాళ్లు తమ అసలు ఉద్దేశాన్ని వెంటనే బయట పెట్టరు; మొదట డెలివరీ ఏజెంట్, బ్యాంక్ ఉద్యోగి లేదా కస్టమర్ సపోర్ట్ ప్రతినిధిగా నటిస్తూ నమ్మకాన్ని కలిగిస్తారు. ఆ తర్వాత, డబ్బు చెల్లించమని, కేవైసీ వివ‌రాలు అప్‌డేట్ చేయమని, ఓటీపీలు ఇవ్వమని లేదా వ్యక్తిగత సమాచారాన్ని పంచుకోమని అడుగుతారు. గూగుల్ రూపొందించిన ఈ కొత్త రక్షణ వ్యవస్థ, కేవలం ఒక సందేశాన్ని మాత్రమే కాకుండా, మొత్తం సంభాషణలోని సరళిని గమనిస్తుంది. దీనివల్ల క్రమంగా సాగే మోసాలను లేదా పరోక్షంగా ఉండే మోసపూరిత సందేశాలను గుర్తించడం సులభం అవుతుంది. ఈ ప్రక్రియ కోసం గూగుల్ క్లౌడ్-ఆధారిత జెమిని మోడళ్లను ఉపయోగిస్తుంది.