ఉద్యోగుల‌కు కేర‌ళ స‌ర్కార్ ఖుష్ క‌బ‌ర్

కేర‌ళ : కేర‌ళ‌లో కొత్త‌గా కొలువు తీరిన కాంగ్రెస్ కూట‌మి స‌ర్కార్ గుడ్ న్యూస్ చెప్పింది. ఉద్యోగులకు బోనస్ తో పాటు ప్రత్యేక పండుగ భత్యాన్ని ప్రకటించింది. 2025-26 ఆర్థిక సంవత్సరానికి గాను రాష్ట్ర ప్రభుత్వ ఉద్యోగులు , ఇతర వర్గాల వారికి రూ. 4,500 వరకు బోనస్ , ప్రత్యేక పండుగ భత్యాన్ని మంజూరు చేసినట్లు అధికారికంగా ప్ర‌క‌టించింది. ఈ మేర‌కు ఉత్త‌ర్వులు జారీ చేసింది. ప్రభుత్వ ఉత్తర్వుల ప్రకారం బోనస్‌కు అర్హులైన ఉద్యోగులకు ఒక నెల జీతం లేదా రూ. 4,500 – వీటిలో ఏది తక్కువైతే అది – బోనస్‌గా లభిస్తుంది. మార్చి 31, 2026 నాటికి 11వ వేతన సవరణ స్కేల్ ప్రకారం మొత్తం జీతం రూ. 49,275 వరకు ఉన్న రాష్ట్ర ప్రభుత్వ ఉద్యోగులు, ఎయిడెడ్ విద్యాసంస్థల ఉద్యోగులు , స్థానిక స్వపరిపాలన సంస్థల ఉద్యోగులకు ఈ బోనస్ వర్తిస్తుందని ఉత్తర్వులో పేర్కొంది. బోనస్ పొందడానికి ఉద్యోగులు మార్చి 31, 2026 నాటికి విధిలో ఉండి, 2025-26 ఆర్థిక సంవత్సరంలో కనీసం ఆరు నెలల నిరంతర సేవను పూర్తి చేసి ఉండాలి.

బోనస్‌కు అర్హత లేని ఉద్యోగులకు వారి వర్గాన్ని బట్టి వేర్వేరు రేట్లలో ప్రత్యేక పండుగ భత్యం లభిస్తుందని తెలిపింది. ఈ భత్యం రూ. 3,000 నుండి రూ. 1,250 వరకు ఉంటుంది. గత ఓనం సెలవుల తర్వాత విధుల్లో చేరిన మంత్రులు, స్పీకర్, డిప్యూటీ స్పీకర్, ప్రతిపక్ష నాయకుడు , చీఫ్ విప్ యొక్క వ్యక్తిగత సిబ్బందికి రూ. 3,000 ప్రత్యేక పండుగ భత్యం లభిస్తుంది. ఆశా కార్యకర్తలు, అంగన్‌వాడీ కార్యకర్తలు, సహాయకులు , ఆయాలు, పాలియేటివ్ కేర్ నర్సులు, బ‌డ్స్ పాఠశాల ఉపాధ్యాయులు, ఉద్యోగులకు రూ. 1,450 లభిస్తాయి. పాఠశాల కౌన్సిలర్లకు రూ. 1,390, ఎమ్మెల్యేల అదనపు సిబ్బందికి రూ. 1,350 లభిస్తాయి. సర్వీస్ పెన్షనర్లు, కుటుంబ పెన్షనర్లు , ఇతర వర్గాల పెన్షనర్లు రూ. 1,250 ప్రత్యేక పండుగ భత్యం పొందేందుకు అర్హులు. బోనస్ , ప్రత్యేక పండుగ భత్యం పంపిణీ ఆగస్టు 17 నుండి ప్రారంభమవుతుందని ఆ ఉత్తర్వు పేర్కొంది. 2025-26 సంవత్సరానికి సంబంధించిన ప్రయోజనాలను 2027 మార్చి 31 నాటికి లేదా అంతకంటే ముందే పొంది, పంపిణీ చేయాలని కూడా అందులో తెలిపారు.