పోలవరం : పోలవరం ప్రాజెక్టు వద్ద గోదావరి నదీజలాల రంగు మారింది. వర్షాకాలంలో ఎగువ ప్రాంతాల నుంచి వచ్చిన వరదతో రాగి వర్ణంలో కనిపించిన జలాలు.. ప్రస్తుతం వరద ఉద్ధృతి తగ్గడంతో నీలి రంగులోకి మారాయి. జూలై నుంచి అక్టోబరు మొదటి వారం వరకు ఎరుపు, గోధుమ ఛాయల్లో కనిపించిన నీరు.. అక్టోబరు మధ్య నాటికి నీలి రంగులో దర్శనం ఇస్తోంది.. జూలై నుంచి అక్టోబరు మొదటి వారం వరకు నదిలో ఎరుపు, గోధుమ ఛాయలు కనిపించగా.. అక్టోబరు మధ్య నాటికి నీటి రంగులో స్పష్టమైన మార్పు చోటు చేసుకుంది. ఎగువ ప్రాంతాల్లో కురిసిన వర్షాలతో గోదావరిలో వరద ప్రవాహం పెరిగింది. కొండలు, వాగుల నుంచి వచ్చిన నీటితో పాటు మట్టి, ఇసుక రేణువులు నదిలోకి చేరాయి. దీంతో పోలవరం వద్ద జలాలు రాగి రంగులో కనిపించాయి. వర్షాలు తగ్గి వరద ఉద్ధృతి సద్దుమణగడంతో నదిలోకి మట్టి చేరడం తగ్గింది. నీటిలో తేలియాడే మట్టి కణాలు నదీగర్భంలో అవక్షేపాలుగా పేరుకుపోవడంతో జలాలు నీలి రంగులోకి మారాయి.
అక్టోబరు మధ్య నాటికి గోదావరిలో వరద ప్రవాహం తగ్గింది. ప్రస్తుతం నీటిలో మట్టి కణాల పరిమాణం తగ్గడంతో నదీజలాలు స్పష్టంగా కనిపిస్తున్నాయి. శీలేరు నుంచి గోదావరిలోకి చేరుతున్న నీరు కూడా నీలి రంగులో ఉండటంతో పోలవరం వద్ద ఈ మార్పు కనిపిస్తోంది. వర్షాకాలంలో వరద నీటితో నిండుగా కనిపించిన గోదావరి.. ప్రస్తుతం సాధారణ ప్రవాహ పరిస్థితుల్లో కొనసాగుతోంది. పోలవరం స్పిల్‌వే వద్ద నదీజలాల రంగులో వచ్చిన మార్పు కాలానుగుణంగా మారుతున్న ప్రవాహ పరిస్థితులను ప్రతిబింబిస్తోంది. ఇదిలా ఉండ‌గా తాజాగా అంత‌ర్జాతీయ నిపుణుల బృందం మూడు రోజుల పాటు ప‌ర్య‌టించింది. పోలవరం ప్రాజెక్టు నిర్మాణం ప‌నులపై సంతృప్తి వ్య‌క్తం చేసింది. యుద్ద ప్రాతిప‌దిక‌న ప్రాజెక్టు ప‌నులు పూర్తి చేయాల‌ని ఇప్ప‌టికే ఆదేశించారు సీఎం నారా చంద్ర‌బాబు నాయుడు.