చెన్నై : రాజకీయంగా ప్రత్యర్థులు అయినప్పటికీ వ్యక్తిగతంగా తనకు ఎలాంటి ద్వేషం లేదని చాటాడు తమిళనాడు రాష్ట్ర నూతన ముఖ్యమంత్రి జోసెఫ్ విజయ్ చంద్రశేఖర్. సోమవారం ఎవరూ ఊహించని రీతిలో ఉన్నట్టుండి ఎన్నికల ప్రచారంలో తీవ్ర ఆరోపణలు చేసిన మాజీ సీఎం ఎంకే స్టాలిన్ ఇంటికి తనే వెళ్లాడు సీఎం. ఆయనకు ఎదురేగి స్వాగతం పలికారు మాజీ ఉప ముఖ్యమంత్రి ఉదయనిధి స్టాలిన్. ఇటీవల ముగిసిన అసెంబ్లీ ఎన్నికలలో అపూర్వ విజయం సాధించి ప్రమాణ స్వీకారం చేసిన ఒక రోజు తర్వాత కలవడం ఆసక్తిని రేపింది. స్టాలిన్ తన చెన్నై నివాసంలో విజయ్కు స్వాగతం పలికారు, అక్కడ ఇద్దరు నాయకులు ఒకరినొకరు పలకరించుకుని, ఆప్యాయంగా ఆలింగనం చేసుకున్నారు.
ఈ సమావేశానికి సంబంధించిన దృశ్యాలలో, నల్ల సూట్లో ఉన్న విజయ్, డీఎంకే అధినేతకు చేతులు జోడించి నమస్కరిస్తూ కనిపించారు. స్టాలిన్ కూడా అదే విధంగా స్పందించారు. అనంతరం ఇద్దరూ కరచాలనం చేసుకుని, ఆల్వార్పేట్ నివాసంలోకి ప్రవేశించే ముందు ఆలింగనం చేసుకున్నారు. ముఖ్యమంత్రిగా బాధ్యతలు స్వీకరించిన తర్వాత స్టాలిన్తో విజయ్కు ఇదే మొదటి సంభాషణ. ఈ పర్యటనను ‘మర్యాద పూర్వక భేటీ’గా అభివర్ణించారు మాజీ సీఎం. ఈ సమావేశంలో విజయ్, స్టాలిన్ పరస్పర గౌరవానికి చిహ్నంగా పట్టు శాలువలు, పుష్పగుచ్ఛాలు కూడా ఇచ్చిపుచ్చుకున్నారు. ప్రస్తుతం మాజీ సీఎం స్టాలిన్, తాజీ సీఎం జోసెఫ్ విజయ్ చంద్రశేఖర్ ల భేటీ కి సంబంధించిన ఫోటోలు, వీడియోలు సోషల్ మీడియాను హల్ చల్ చేస్తున్నాయి.
