తాడేప‌ల్లిగూడెం : వైఎస్ షర్మిలకు తన సోద‌రుడు, మాజీ సీఎం వైఎస్ జగన్ మోహన్ రెడ్డి లేఖ రాయ‌డాన్ని కావాల‌ని రాజ‌కీయం చేస్తున్నాడంటూ ఏపీ సీఎం నారా చంద్రబాబు నాయుడుపై సంచ‌ల‌న ఆరోప‌ణ‌లు చేసింది వైఎస్సార్సీపీ. స్థానిక సంస్థల ఎన్నికల్లో హింస, ప్రజాస్వామ్యంపై దాడుల నుంచి ప్రజల దృష్టిని మళ్లించేందుకు ముఖ్యమంత్రి ప్రయత్నిస్తున్నారని విమ‌ర్శించింది. అక్టోబర్ 9 నాటి లేఖలో తన అభ్యంతరాలను ముందే తెలియజేసినట్లు జగన్ పేర్కొన్నాడ‌ని తెలిపింది. షర్మిల కుమార్తె అంజలి వివాహ వేదిక విషయంలో తలెత్తిన కుటుంబ వివాదంపై ముఖ్యమంత్రి ఎన్. చంద్రబాబు నాయుడు చేస్తున్న ఆరోపణలను తిప్పికొట్టేందుకు, వైఎస్సార్సీపీ అధ్యక్షుడు వై.ఎస్. జగన్ మోహన్ రెడ్డి తన సోదరి, రాష్ట్ర కాంగ్రెస్ అధ్యక్షురాలు షర్మిలకు లేఖ రాశార‌ని తెలిపింది. కాగా నామినేషన్ కేంద్రాలపై దాడులు, పరిషత్ ఎన్నికల ప్రక్రియలో అక్రమాలు చోటు చేసుకోవడంపై తీవ్ర ఆందోళన వ్యక్తమవుతోందని పార్టీ పేర్కొంది.
ఈ అంశాలపై వైఎస్సార్సీపీ చేపట్టిన న్యాయ పోరాటం సుప్రీంకోర్టు జోక్యానికి దారి తీసిందని, తద్వారా రాష్ట్ర ఎన్నికల పరిణామాలు జాతీయ స్థాయిలో చర్చనీయాంశమయ్యాయని తెలిపింది. ఈ సమస్యల నుంచి ప్రజల దృష్టిని మరల్చేందుకే చంద్రబాబు ఇప్పుడు జగన్ వ్యక్తిత్వాన్ని లక్ష్యంగా చేసుకున్నారని పార్టీ ఆరోపించింది. బెంగళూరులోని యలహంకలో ఉన్న తన నివాసంలో అంజలి వివాహాన్ని జరపడంపై జగన్ తన అభ్యంతరాలను వ్యక్తం చేసిన మాట వాస్త‌వ‌మేన‌ని పేర్కొంది. వివాహ వేడుక కోసం క్యాటరింగ్ సిబ్బంది, డెకరేటర్లు, ఈవెంట్ మేనేజర్లు, ఫోటోగ్రాఫర్లు, వీడియోగ్రాఫర్లు , అనేకమంది అతిథులు ఇంటికి వస్తారని, వారిలో చాలామంది కుటుంబానికి తెలియని వ్యక్తులు ఉంటారని అందుకే అభ్యంత‌రం తెలియ చేయ‌డం జ‌రిగింద‌ని వెల్ల‌డించింది. ఇలాంటి రాకపోకల వల్ల భద్రతా పరమైన ముప్పులు ఏర్పడే అవకాశం ఉందని, అంతేకాకుండా తన నివాసం, దాని పరిసరాలు బయటి ప్రపంచానికి ఫోటోలు, వీడియోల రూపంలో బహిర్గతమవుతాయని ఆందోళన వ్యక్తం చేసింది.
పెళ్లికి దాదాపు రెండు నెలల ముందే తాను కుటుంబ సభ్యుల ద్వారా తన అభ్యంతరాలను తెలియ జేశానని, అయినప్పటికీ షర్మిల ఏర్పాట్లను కొనసాగించి, ఆహ్వాన పత్రికలపై వేదికగా బెంగళూరు నివాసాన్ని ముద్రించారని జగన్ ఆరోపించారు. ఆ లేఖలో, తన నిర్ణయాన్ని పునః పరిశీలించుకోవాలని ఆమెను కోరుతూ, కన్వెన్షన్ సెంటర్ లేదా డెస్టినేషన్ వెడ్డింగ్ వేదికను సూచించారు. ప్రత్యామ్నాయంగా హైదరాబాద్‌లోని తన లోటస్ పాండ్ ఆస్తిని కూడా ఆయన ప్రతిపాదించారు. జగన్ తన ఆందోళనలను ముందుగానే తెలియజేశారని, ఈ వివాదం తన మేనకోడలి పెళ్లిని అడ్డుకోవడానికి చివరి నిమిషంలో చేసిన ప్రయత్నం కాదని ఆ లేఖ నిరూపిస్తోందని వైఎస్సార్సీపీ పేర్కొంది.