హైదరాబాద్ : వాతావరణ శాఖ (ఐఎండీ) కీల‌క ప్ర‌క‌ట‌న చేసింది. రాబోయే కొన్ని రోజుల్లో హైదరాబాద్‌లో రాత్రులు మరింత చల్లగా మారే అవకాశం ఉంది. కొన్ని ప్రాంతాల్లో కనిష్ట ఉష్ణోగ్రతలు 16°C వరకు పడిపోవచ్చు. అయితే బంగాళాఖాతంలో ఏర్పడుతున్న వాతావరణ వ్యవస్థ ఆంధ్రప్రదేశ్ తీరానికి దగ్గరగా వస్తుండటంతో, ఈ చల్లని వాతావరణం త్వరలోనే మారే అవకాశం ఉంది . ‘తెలంగాణ వెదర్‌మ్యాన్’ గా ప్రాచుర్యం పొందిన స్వతంత్ర వాతావరణ సూచిక నిపుణుడు టి. బాలాజీ మాట్లాడుతూ ఉత్తర దిశ నుండి వీచే గాలుల వల్ల అక్టోబర్ 25, 26 , 27 తేదీ రాత్రులలో హైదరాబాద్‌లో చలి పెరుగుతుందని తెలిపారు. మధ్య తెలంగాణలోని కొన్ని ప్రాంతాల్లో ఉష్ణోగ్రతలు మరింత తగ్గి, సుమారు 14°Cకి చేరుకోవచ్చు అని పేర్కొన్నారు.
ఈ ఆహ్లాదకరమైన వాతావరణం ఎక్కువ కాలం ఉండక పోవచ్చు; బంగాళాఖాతంలో ఏర్పడుతున్న వ్యవస్థ కారణంగా, ఈ వారం చివరలో తెలంగాణలోని కొన్ని ప్రాంతాల్లో వర్షాలు కురిసే అవకాశం ఉంది . బలమైన గాలులు వీచవచ్చు. బాలాజీ తెలిపిన వివరాల ప్రకారం ఈ వాతావరణ వ్యవస్థ ‘అర్నాబ్’ అనే తీవ్ర తుపానుగా మారి అక్టోబర్ 28న మధ్య ఆంధ్రప్రదేశ్ తీరాన్ని దాటే అవకాశం ఉంది. అయితే, భారత వాతావరణ శాఖ ఇంకా దీనిని తీవ్ర తుపానుగా వర్గీకరించలేదు. ఈ తుపాను ప్రభావం తూర్పు తెలంగాణపై ఎక్కువగా ఉండే అవకాశం ఉంది. భద్రాద్రి కొత్తగూడెం, ఖమ్మం, ములుగు, మహబూబాబాద్ వంటి జిల్లాల్లో అక్టోబర్ 28 మధ్యాహ్నం నుండి అక్టోబర్ 29 మధ్యాహ్నం మధ్య భారీ నుండి అతి భారీ వర్షాలు కురిసే అవకాశం ఉందని బాలాజీ పేర్కొన్నారు.
ఈ వాతావరణ వ్యవస్థ కారణంగా హైదరాబాద్‌లో ఆకాశం మేఘావృతమై, వాతావరణ పరిస్థితుల్లో మార్పులు రావచ్చు. భారత వాతావరణ శాఖ హైదరాబాద్ కేంద్రం అంచనా ప్రకారం అక్టోబర్ 27 వరకు తెలంగాణ అంతటా పొడి వాతావరణం ఉంటుంది; ఈ కాలానికి సంబంధించి ఎటువంటి ప్రత్యేక వాతావరణ హెచ్చరికలు జారీ చేయలేదు. అక్కడక్కడ నుంచి చిరుజల్లులు కురుస్తాయని వాతావరణ శాఖ అంచనా వేసింది. అక్టోబర్ 28న కూడా అక్కడక్కడ భారీ వర్షాలు కురిసే అవకాశం ఉంది ఈ కాలంలో రాష్ట్రవ్యాప్తంగా గాలి వేగం గంటకు 30-40 కిలోమీటర్ల వరకు చేరవచ్చు, అప్పుడప్పుడు గంటకు 50 కిలోమీటర్ల వరకు ఈదురు గాలులు వీస్తాయి.