న్యూఢిల్లీ : కేంద్ర ప్రభుత్వ ఆధీనంలోని నీతి ఆయోగ్ కీలక ప్రకటన చేసింది. తెలంగాణ, కర్ణాటక రాష్ట్రాలకు తీపి కబురు చెప్పింది. ఈ మేరకు ఆయా రాష్ట్రాల రాజధానులైన హైదరాబాద్ , బెంగళూరు నగరాలను బయో ఎకానమీ హబ్ లుగా ప్రకటించింది. ఈ మేరకు గుర్తించినట్లు తెలిపింది. 2040 నాటికి ఈ రంగం $1.36 ట్రిలియన్లకు వృద్ధి చెందుతుందని అంచనా వేసింది. 2035 నాటికి భారతదేశాన్ని ఒక ప్రముఖ బయోఎకానమీ పవర్హౌస్గా నిర్మించడానికి నీతి ఆయోగ్ రోడ్మ్యాప్ తయారు చేసింది. భారతదేశ బయో ఎకానమీ 2025లో $195 బిలియన్ల నుండి 2040 నాటికి $1.36 ట్రిలియన్లకు వృద్ధి చెందుతుందని అంచనా వేసింది నీతి ఆయోగ్. ఈ పరివర్తనను నడిపించే జంట హబ్లుగా హైదరాబాద్ , బెంగళూరులను గుర్తించింది. నివేదికలో ఉదహరించిన ప్రపంచ అంచనాల ప్రకారం, 2050 నాటికి బయో ఎకానమీ ప్రపంచ జీడీపీలో 12–13 శాతం వరకు వాటాను అందించగలదు.
ఉత్పత్తి ఆధారిత ప్రోత్సాహకాలు, జాతీయ బయోటెక్ పార్కులు, పెట్టుబడులు, స్టార్టప్లను ఉత్ప్రేరకపరిచిన చురుకైన రాష్ట్ర లైఫ్ సైన్సెస్ విధానాలే భారతదేశంలో వేగవంతమైన రంగాల విస్తరణకు కారణమని నివేదిక పేర్కొంది. తెలంగాణ, కర్ణాటక , గుజరాత్ రాష్ట్రాలు ప్రత్యేక ప్రోత్సాహకాలు, రాయితీతో కూడిన భూమి, సింగిల్-విండో సౌకర్యాలను అమలు చేసి, లైఫ్ సైన్సెస్ కార్యకలాపాల సమూహీకరణను వేగవంతం చేశాయని తెలిపింది నీతి ఆయోగ్. స్థిరపడిన ఫార్మా , బయోలాజిక్స్ క్లస్టర్లు, జాతీయ పరిశోధనా సంస్థలు, బయోటెక్ పార్కులు, ట్రాన్స్లేషనల్ ఇన్ఫ్రాస్ట్రక్చర్ వృద్ధిలో గణనీయమైన వాటాను దక్కించు కునేందుకు దానికి అవకాశం కల్పిస్తున్నాయని తెలిపింది.
