అమరావతి : ఏపీ సీఎం చంద్రబాబు నాయుడు కీలక వ్యాఖ్యలు చేశారు. రాష్ట్రంలోని 5,000 ఆలయాల నిర్మాణాన్ని వేగవంతం చేయాలని టీటీడీ, దేవాదాయ శాఖ అధికారులను ఆదేశించారు. ఎస్సీ, ఎస్టీ కాలనీలు, మత్స్యకార నివాసాలు, బలహీన వర్గాల కాలనీలు, సాధారణ ప్రాంతాలకు ప్రాధాన్యతనిస్తూ మూడు వర్గాలుగా ఆలయాలను నిర్మిస్తామని నాయుడు తెలిపారు. రాష్ట్ర వ్యాప్తంగా ఆలయాల నిర్మాణాన్ని వేగవంతం చేయాలని, అందుకు సంబంధించిన స్థలాలను వీలైనంత త్వరగా ఖరారు చేయాలని స్పష్టం చేశారు. హిందూ ధర్మం , ఆధ్యాత్మికతను ప్రోత్సహించేందుకు టీటీడీ తన కార్యక్రమాలను విస్తరించాలని సూచించారు ముఖ్యమంత్రి. ప్రతిపాదిత స్థలాలు ఖరారైన వెంటనే ఆలయ నిర్మాణ పనులను ప్రారంభించాలని అధికారులకు నిర్దేశించారు. టీటీడీ, దేవాదాయ శాఖల పనితీరుపై సీఎం సమీక్ష చేపట్టారు.
28 జిల్లాల్లోని 161 నియోజకవర్గాల నుండి 4,192 ఆలయాల నిర్మాణానికి ప్రతిపాదనలు అందాయని, ఇప్పటికే 967 ఆలయాల నిర్మాణం పూర్తయిందని టీటీడీ ఎగ్జిక్యూటివ్ ఆఫీసర్ ముద్దాడ రవిచంద్ర తెలిపారు. ఎస్సీ, ఎస్టీ కాలనీలు, మత్స్యకార నివాసాలు, బలహీన వర్గాల కాలనీలు , సాధారణ ప్రాంతాలకు ప్రాధాన్యతనిస్తూ మూడు వర్గాలుగా ఆలయాలను నిర్మిస్తామని ఆయన చెప్పారు. ఆలయాలకు స్థలాలు ఖరారైన తర్వాత పనులను వేగవంతం చేయవచ్చని తెలిపారు; ఆలయ నిర్మాణం , మతపరమైన కార్యక్రమాల కోసం ‘శ్రీవాణి ట్రస్ట్’ ద్వారా వచ్చిన నిధులను వినియోగించాలని నాయుడు సూచించారు. 11.8 లక్షల మంది శ్రీవారి సేవ వాలంటీర్లు ఉన్నారని పేర్కొన్న ఆయన, కొత్తగా నిర్మించే ఆలయాల్లో వారి సేవలను వినియోగించు కోవాలని సూచించారు. బోర్డు సభ్యులు, భక్తులు , శ్రీవారి సేవ వాలంటీర్లతో కూడిన కార్యనిర్వాహక కమిటీల ఏర్పాటును పరిశీలించాలని ముఖ్యమంత్రి ఆదేశించారు.
ఇతర రాష్ట్రాల ప్రభుత్వాలతో సంప్రదింపులు జరిపి, ఆయా రాష్ట్రాల రాజధానులలో కూడా శ్రీ వేంకటేశ్వర స్వామి ఆలయాలను నిర్మించాలని నాయుడు అన్నారు. మారిషస్ వంటి దేశాలు కూడా శ్రీ వేంకటేశ్వర స్వామి ఆలయాల నిర్మాణాన్ని కోరుతున్నాయని చెప్పిన ఆయన, శ్రీవారి ఆలయాలను హిందువులకు ఆధ్యాత్మిక కేంద్రాలుగా అభివృద్ధి చేయాలని సూచించారు. ఆలయాలకు అవసరమైన అర్చకులను సిద్ధం చేయడానికి ప్రత్యేక శిక్షణా తరగతులు నిర్వహించాలని, అలాగే విగ్రహ ప్రతిష్ఠాపన , అర్చకుల శిక్షణ కోసం సమగ్ర ప్రణాళికను రూపొందించాలని ఆయన అధికారులను ఆదేశించారు. రాష్ట్రంలోని 1,000 పురాతన ఆలయాలను పునరుద్ధరించాలని, శివాలయాలు, శక్తిపీఠాల అభివృద్ధిపై ప్రత్యేక దృష్టి సారించాలని కూడా ముఖ్యమంత్రి సూచించారు.
రాష్ట్ర వ్యాప్తంగా ఉన్న ఆలయాల సమగ్ర వివరాలను డిజిటలైజ్ చేయాలని, అలాగే దేవాదాయ శాఖ పరిధిలోని 28,000 ఆలయాలు, 65 టీటీడీ ఆలయాలు, కొత్తగా నిర్మించిన 5,000 ఆలయాల నిర్వహణకు ముందస్తు ప్రణాళికను సిద్ధం చేయాలని ఆయన ఆదేశించారు. ప్రజల భాగస్వామ్యంతో ప్రభుత్వ ఆధ్వర్యంలోని ఆలయాలను సమర్థవంతంగా నిర్వహించాలని నాయుడు పిలుపునిచ్చారు. టీటీడీకి చెందిన అన్నదానం, ప్రాణదానం, శ్రీవారి సేవ , ఆలయ నిర్మాణ కార్యక్రమాలను హిందూ ధర్మ ప్రచారంతో అనుసంధానించాలని సూచించారు. నిపుణులైన వైద్యుల సేవలను వినియోగించుకుంటూ, టీటీడీ వైద్య సేవలకు ‘ప్రాణదానం ట్రస్ట్’ను ఒక నమూనాగా తీర్చిదిద్దాలని ఆయన అధికారులను ఆదేశించారు.
టీటీడీ పరిధిలోని ఆసుపత్రులన్నింటినీ ఏకీకృతం చేయాలని, తిరుపతిలో క్యాన్సర్, కంటి వైద్యం , ఆయుర్వేద సేవలతో సహా వైద్య సేవలను విస్తరించాలని నాయుడు సూచించారు; అలాగే వైద్యులను ‘శ్రీవారి సేవ’ వాలంటీర్లుగా మార్చి, వారి సేవలను వైద్య చికిత్సతో పాటు బోధనా కార్యక్రమాల్లోనూ వినియోగించు కోవాలని పేర్కొన్నారు. అంతే కాకుండా టీటీడీ పరిధిలోని 33 విద్యాసంస్థల వ్యవస్థను మరింత సమర్థవంతంగా తీర్చిదిద్దాలని, హాస్టల్ సామర్థ్యాన్ని రెట్టింపు చేయాలని సీఎం అధికారులను ఆదేశించారు. విద్య, వైద్యం , సేవా కార్యక్రమాలను విస్తృత స్థాయిలో చేపట్టాల్సిన అవసరాన్ని ఆయన నొక్కి చెప్పారు.