చెన్నై : తమిళనాడు సీఎం జోసెఫ్ విజయ్ చంద్రశేఖర్ సంచలనంగా మారారు మరోసారి దేశ వ్యాప్తంగా. ఓ వైపు రైతుల వ్యతిరేకత ఉన్నప్పటికీ కావేరీ అంశంపై కర్ణాటకతో చర్చలు కొనసాగించేందుకే సిద్దమయ్యారు సీఎం. ప్రస్తుతం రాష్ట్రమంతటా ఇది చర్చకు దారితీసేలా చేసింది. ఇదిలా ఉండగా రాష్ట్ర వ్యవసాయ శాఖ మంత్రి ఆర్. వినోత్తో జరిగిన సంప్రదింపుల సమావేశంలో పాల్గొన్న రైతు ప్రతినిధులు, రెండు రాష్ట్రాల మధ్య జరగాల్సిన చర్చలను రద్దు చేయాలని కోరారు. సుదీర్ఘకాలంగా కొనసాగుతున్న కావేరీ నదీ జలాల పంపిణీ వివాదాన్ని పరిష్కరించేందుకు పొరుగు రాష్ట్రమైన కర్ణాటకతో ద్వైపాక్షిక చర్చలు జరపడానికి తమిళనాడు ముఖ్యమంత్రి సి. జోసెఫ్ విజయ్ ఆసక్తిగా ఉన్నారని అధికారిక వర్గాలు మంగళవారం తెలిపాయి. అయితే, చర్చలను విరమించుకోవాలని రైతులు గట్టిగా వ్యతిరేకిస్తున్నారు. రాష్ట్రంలో ముఖ్యంగా కావేరీ డెల్టా జిల్లాలైన తంజావూరు, తిరువారూర్ , నాగపట్నంలలో తీవ్ర నీటి కొరత నెలకొంది.
దీనివల్ల స్వల్పకాలిక ‘కురువై’ వరి పంట సాగుకు ఆటంకం ఏర్పడింది. అంతే కాకుండా తగినంత నీటి నిల్వ లేకపోవడంతో జూన్ 12న జరగాల్సిన మేట్టూర్ ఆనకట్ట ప్రారంభోత్సవం వాయిదా పడింది. ఈ పరిస్థితుల్లో దౌత్యపరమైన చర్చలు జరపడానికి బదులుగా కర్ణాటకపై చట్టపరమైన మార్గాలను అన్వేషించాలని రైతులు రాష్ట్ర ప్రభుత్వాన్ని డిమాండ్ చేశారు. ప్రత్యక్ష చర్చలు జరపడం వల్ల ఇప్పటికే ఉన్న చట్టపరమైన విధానాలను పక్కన పెట్టినట్లు అవుతుందని, సుప్రీంకోర్టు తీర్పుకు విరుద్ధంగా ఉంటుందని తమిళనాడు కావేరీ రైతుల సంఘం ప్రతినిధులు వాదించారు. ఈ చర్చలను తీవ్రంగా వ్యతిరేకిస్తున్న ప్రతిపక్ష పార్టీ డీఎంకే కావేరీ జల వివాదాన్ని పరిష్కరించడానికి ఒక ప్రత్యేక ట్రిబ్యునల్ను ఏర్పాటు చేయాలని , కావేరీ జలాల్లో రాష్ట్రానికి దక్కాల్సిన వాటాను సాధించాలని ప్రభుత్వాన్ని డిమాండ్ చేసింది.
