హైదరాబాద్ : ప్రజాస్వామ్యానికి పత్రికా స్వేచ్ఛ అత్యవసరం అని పేర్కొన్నారు ఉప ముఖ్యమంత్రి మల్లు భట్టి విక్రమార్క. హైదరాబాద్లో ‘ఫెడరేషన్ ఆఫ్ ప్రెస్ క్లబ్స్’ను లాంఛనంగా ప్రారంభించారు. అధికారంలో ఉన్నవారిని జవాబుదారీగా ఉంచే స్వేచ్ఛాయుత, నిర్భయ పత్రికా స్వేచ్ఛ ప్రజాస్వామ్యానికి అత్యవసరమని, విమర్శలను స్వీకరించే ధైర్యం ప్రభుత్వాలకు ఉండాలని ఆయన అన్నారు. భారత స్వాతంత్ర ఉద్యమంలో పాత్రికేయ రంగం పోషించిన చారిత్రక పాత్రను భట్టి ప్రముఖంగా ప్రస్తావించారు. గాంధీ, డాక్టర్ బి.ఆర్. అంబేద్కర్, బాల్ గంగాధర్ తిలక్ తదితరులు చేసిన సేవలను గుర్తు చేసుకున్నారు. కార్టూనిస్ట్ శంకర్కు నెహ్రూ చెప్పిన ప్రసిద్ధ సందేశం “నన్ను వదలొద్దు, శంకర్”—ను ఉటంకిస్తూ వృత్తిపరమైన ప్రమాణాలకు రాజీ పడకుండా అధికారంలో ఉన్నవారిని ప్రశ్నించాలని ఆయన పాత్రికేయులను కోరారు.
డిజిటల్, ఏఐ యుగంలో, ముఖ్యంగా తప్పుడు సమాచారం, డీప్ఫేక్లు వేగంగా వ్యాప్తి చెందుతున్న తరుణంలో, విశ్వసనీయతే పాత్రికేయ రంగానికి అతిపెద్ద ఆస్తి అని ఆయన నొక్కి చెప్పారు . పాత్రికేయలు ముఖ్యంగా జిల్లాలు, గ్రామీణ ప్రాంతాల్లో పనిచేస్తున్న వారి భద్రత, గౌరవం, సంక్షేమాన్ని పరిరక్షించాలని కూడా భట్టి ఫెడరేషన్ను కోరారు. అధికారులు వినడానికి సిద్ధంగా ఉన్నప్పుడు, స్థానిక విలేకరులు ప్రభుత్వానికి “అత్యుత్తమ ముందస్తు హెచ్చరిక వ్యవస్థ”గా పనిచేస్తారని ఆయన అభివర్ణించారు. హల్ద్వానీలోని రామ్లీలా మైదాన్లో కాంగ్రెస్ అధ్యక్షుడు మల్లికార్జున్ ఖర్గే సమావేశం అనంతరం జరిగినట్లు వార్తలు వచ్చిన “శుద్ధీకరణ” ఆచారాన్ని ప్రస్తావించారు. స్వాతంత్రం వచ్చి దశాబ్దాలు గడిచినా వివక్ష కొనసాగడాన్ని ఆయన ప్రశ్నించారు.
అధికారంలో ఉన్నవారిని వదిలిపెట్టవద్దు. మమ్మల్ని జవాబుదారీగా ఉంచండి, కానీ వృత్తిపరమైన ప్రమాణాల విషయంలో ఎన్నడూ రాజీ పడకండి. అంతిమంగా, దాని ప్రయోజనం పౌరుడికే దక్కాలి అని మల్లు భట్టి విక్రమార్క ఆకాంక్షించారు.