హైదరాబాద్ : సిద్దిపేట జిల్లా మర్కూక్ మండలం ఎర్రవల్లి గ్రామంలో ఉన్న బీఆర్ఎస్ అధ్యక్షుడు, తెలంగాణ మాజీ ముఖ్యమంత్రి కె. చంద్రశేఖర రావు ఫామ్‌హౌస్‌కు చెందిన భూముల ప్రామాణికతను నిర్ధారించేందుకు రెవెన్యూ అధికారులు సమగ్ర సర్వేకు సిద్ధమయ్యారు. ఈ ప్రక్రియలో భాగంగా గ్రామంలోని రైతులకు ముందస్తు నోటీసులు ఇచ్చేందుకు అధికారులు ఏర్పాట్లు చేస్తున్నారు. ఈ సర్వేలో పాల్గొనాలని కోరుతూ కేసీఆర్ కు కూడా ఎప్పుడైనా నోటీసు అందే అవకాశం ఉందని సమాచారం. భూమి వివరాలు , సర్వే నంబర్లను అధికారిక రెవెన్యూ రికార్డులతో సరిపోల్చి, ఫామ్‌హౌస్ పరిధిలోని భూముల సరిహద్దులను, వాస్తవ విస్తీర్ణాన్ని ధృవీకరించడమే ఈ సర్వే ఉద్దేశ్యం. ఈ పరిణామంతో మర్కూక్ ప్రాంతంలో ఉద్రిక్తత నెలకొన్నట్లు తెలుస్తోంది.
ప్రధానంగా సర్వే నంబర్ 325కు చెందిన భూమి విషయంలో ఆరోపణలు ఉన్నాయి. ఈ భూమిని దశాబ్దాలుగా ఎస్సీ, బీసీ వర్గాలకు చెందిన పేద రైతులు సాగు చేసుకుంటున్నారని సమాచారం. అంతే కాకుండా ధరణి భూ రికార్డులలో మార్పులు చేయడం ద్వారా ఈ భూములను , కొన్ని ప్రభుత్వ భూములను ఫామ్‌హౌస్ విస్తరణలో కలిపేశారని లేదా ఫామ్‌హౌస్‌కు వెళ్లే దారుల కోసం ఉపయోగించారని ఆరోపణలు వినిపిస్తున్నాయి.
ఈ నేపథ్యంలో రెవెన్యూ శాఖ , ఒక ప్రత్యేక విచారణ కమిటీ సమగ్ర సర్వే చేపట్టడానికి సిద్ధమవుతున్నాయి. గూగుల్ ఎర్త్ శాటిలైట్ చిత్రాలు, పాత పహానీ రికార్డులు , ప్రస్తుతం ఉన్న రెవెన్యూ పత్రాలను క్షేత్రస్థాయి పరిస్థితులతో పోల్చి చూసి, అసలైన సరిహద్దులను, యాజమాన్య వివరాలను అధికారులు నిర్ధారించనున్నారు. ప్రభుత్వ భూములు లేదా ప్రైవేట్ వ్యక్తులు సాగు చేసుకుంటున్న భూములు ఫామ్‌హౌస్ పరిధిలోకి వచ్చాయా లేదా అన్న విషయాన్ని తేల్చడమే ఈ సర్వే లక్ష్యం.
