న్యూఢిల్లీ : కేంద్ర ప్రభుత్వం సంచలన నిర్ణయం తీసుకుంది. భారత దేశ సొలిసిటర్ జనరల్గా మెహతాకు మరో మూడేళ్ల పదవీ కాలం పొడిగించింది. ఈ నియామకం జూలై 1, 2026 నుండి అమల్లోకి వస్తుందని కేంద్రం జారీ చేసిన ఉత్తర్వులలో పేర్కొంది. క్యాబినెట్ నియామకాల కమిటీ ఆయనను ఈ పదవిలో మరో మూడేళ్లు లేదా తదుపరి ఆదేశాలు వెలువడే వరకు (ఏది ముందైతే అది) కొనసాగించడానికి ఆమోదం తెలిపింది. మెహతా అక్టోబర్ 10, 2018 నుండి సొలిసిటర్ జనరల్గా సేవలందిస్తున్నారు. ఆయన ప్రస్తుత పదవీకాలం జూన్ 30వ తేదీతో ముగుస్తుంది. సుప్రీంకోర్టుకు సంబంధించి ఐదుగురు అదనపు సొలిసిటర్ జనరల్స్ను కూడా మరో మూడేళ్ల కాలానికి తిరిగి నియమించడానికి కమిటీ ఆమోదం తెలిపింది.
తిరిగి నియమితులైన న్యాయాధికారులలో విక్రమ్జిత్ బెనర్జీ , కె.ఎం. నటరాజ్ ఉన్నారు (వీరి కొత్త పదవీకాలం జూలై 1, 2026న ప్రారంభమవుతుంది); అలాగే ఎస్.వి. రాజు, ఎన్. వెంకటరమణ , ఐశ్వర్య భాటిల నియామకాలు జూన్ 30 నుండి అమల్లోకి వస్తాయి. అదనంగా చేతన్ శర్మను ఢిల్లీ హైకోర్టుకు అదనపు సొలిసిటర్ జనరల్గా జూలై 1 నుండి ఆరు నెలల పాటు లేదా తదుపరి ఆదేశాలు వెలువడే వరకు తిరిగి నియమించారు. మెహతా గతంలో జూలై 1, 2023 నుండి అమల్లోకి వచ్చేలా ఈ పదవికి తిరిగి నియమితులయ్యారు.
ఇదిలా ఉండగా భారతదేశంలోని ప్రముఖ న్యాయవాదుల్లో ఒకరుగా ఉన్నారు. ప్రస్తుతం ఆయన భారత ప్రభుత్వ సొలిసిటర్ జనరల్ గా సేవలందిస్తున్నారు. ఈ పదవి దేశంలో అటార్నీ జనరల్ తరువాత రెండవ అత్యున్నత న్యాయ అధికారిగా పరిగణించ బడుతుంది. తను 11 సెప్టెంబర్ 1964లో పుట్టారు. తన స్వస్థలం జామ్నా నగర్. గుజరాత్ యూనివర్శిటీలో న్యాయ విద్యను అభ్యసించారు. 1987లో గుజరాత్ బార్ కౌన్సిల్లో నమోదు చేసుకున్నారు. 2008లో గుజరాత్ హైకోర్టు ఆయనను సీనియర్ అడ్వకేట్గా గుర్తించింది. 2008–2014 మధ్య గుజరాత్ రాష్ట్ర అదనపు అడ్వకేట్ జనరల్గా పనిచేశారు. 2014లో భారత ప్రభుత్వ అదనపు సొలిసిటర్ జనరల్గా, 2018 అక్టోబర్ 10న భారత సొలిసిటర్ జనరల్గా నియమితులయ్యారు.