Janmashtami : దేశవ్యాప్తంగా అత్యంత భక్తిశ్రద్ధలతో జరుపుకునే పండుగలలో శ్రీకృష్ణ జన్మాష్టమికు (Janmashtami) ప్రత్యేక స్థానం ఉంది. ప్రతి సంవత్సరం భాద్రపద మాసంలో వచ్చే ఈ పవిత్ర రోజున భక్తులు శ్రీకృష్ణుని జన్మదినోత్సవాన్ని (Janmashtami) ఘనంగా నిర్వహిస్తారు. దేవాలయాలు, ఇళ్లలో ప్రత్యేక పూజలు, అలంకరణలతోపాటు 56 రకాల నైవేద్యాలు (చప్పన్ భోగ్) సమర్పించడం విశేషంగా కొనసాగుతున్న సంప్రదాయం.
Janmashtami – చప్పన్ భోగ్ వెనుక పురాణకథ
పురాణాల ప్రకారం, బ్రజ్ ప్రజలు ఒకనాడు వర్షదేవుడు ఇంద్రుడిని పూజించేందుకు ఏర్పాట్లు చేశారు. ఇది చూసిన బాలగోపాల కృష్ణుడు, “ఇంద్రుడిని ఎందుకు పూజించాలి?” అని తన తండ్రి నందుడిని ప్రశ్నించాడు. నందుడు, వర్షాలు కురిసి పంటలు బాగా పండాలంటే ఇంద్రుని అనుగ్రహం అవసరమని వివరించాడు.
అయితే కృష్ణుడు గోవర్ధన పర్వతాన్నే పూజించాలని ప్రజలకు సూచించాడు. “ఈ పర్వతం మనకు ఆహారం, నీరు, మేత, పచ్చదనం కలిగిస్తుందే గానీ, ఇంద్రుడు కాదు,” అని చెప్పాడు. ప్రజలు కృష్ణుని మాట విని గోవర్ధన పర్వతాన్ని పూజించడంతో, కోపంతో కృంగిన ఇంద్రుడు గోకులంపై భారీ వర్షాలు కురిపించాడు.
ఈ విపత్తును ఎదుర్కొనడానికి కృష్ణుడు గోవర్ధన పర్వతాన్ని తన చిటికెన వేలిపై ఎత్తి, వర్షాల నుంచి ప్రజలను, పశుపక్షాదులను రక్షించాడు. ఏడు రోజుల పాటు పర్వతాన్ని నిలబెట్టి ప్రజలకు గొడుగులా నిలిచాడు.
56 భోగాల ఆవిర్భావం
వర్షం ఆగిన తర్వాత గోకులవాసులు, శ్రీకృష్ణుడు ఆ ఏడురోజులూ ఆకలితో ఉన్నాడని భావించి, ఆయన తల్లి యశోదతో కలిసి రోజుకు ఎనిమిది సార్లు తినిపించే ఆహారాన్ని ఏడు రోజులకు గుణించి 56 రకాల వంటకాలు తయారు చేసి నైవేద్యంగా సమర్పించారు. అప్పటి నుంచి ఈ ఆచారం జన్మాష్టమి రోజున పాటించబడుతోంది.
చప్పన్ భోగ్లో ఏముంటాయి?
ఈ 56 రకాల నైవేద్యాలలో పాల పదార్థాలు, తీపి వంటకాలు, తృణధాన్యాలు, పండ్లు, పానీయాలు ప్రధానంగా ఉంటాయి. వాటిలో:
- వెన్న, మఖన్
- లడ్డు, బర్ఫీ, హల్వా, రబ్రీ
- పూరీ, కచోరి, కిచిడి
- సీజనల్ పండ్లు
- శీతల పానీయాలు
- మజ్జిగ, పెరుగు, పాయసం తదితరాలు ఉంటాయి.
జన్మాష్టమి సందర్భంగా ఈ భోగాలను సమర్పించడం భక్తుల శ్రద్ధకు, సంప్రదాయానికి నిలువెత్తు నిదర్శనం. ప్రతి ఇంట్లో ఈ రోజు కృష్ణునికి ప్రత్యేకంగా 56 రకాల భోగాలు పెట్టి పూజలు నిర్వహించడం విశేషం.
Also Read : Varalakshmi Vratam Special Attraction : కర్ణాటకలో నేడు ధనలక్ష్మి గా దర్శనమిస్తున్న చాముండేశ్వరి దేవి
