Ratha Yatra : హైదరాబాద్ బంజారాహిల్స్లోని జగన్నాథ దేవాలయంలో రథయాత్ర (Ratha Yatra) ఉత్సవం ఆధ్యాత్మిక శోభతో ప్రారంభమైంది. పూరీలో జరిపే రథయాత్రకు సమానంగా, ఇక్కడ కూడా జగన్నాథుడు, ఆయన సోదరుడు బలరాముడు, సోదరి సుభద్రకు ప్రత్యేకంగా రథాలు అలంకరించి భక్తుల సమక్షంలో ఊరేగింపుగా నడిపించారు.
Hyderabad Ratha Yatra Viral
వేద మంత్రోచ్ఛారణల మధ్య, మేళతాళాల ధ్వనుల్లో స్వామివారిని రథాలపై ప్రతిష్టించి మొదటగా బలరాముని రథాన్ని, తరువాత సుభద్ర రథాన్ని, చివరిగా జగన్నాథుని రథాన్ని భక్తులు లాగారు. వేలాది మంది భక్తులు ఈ ఉత్సవానికి హాజరై రథాలను లాగేందుకు పోటీ పడ్డారు.
ఈ రథయాత్ర బంజారాహిల్స్ రోడ్ నం.12లోని కనకదుర్గమ్మ ఆలయం వరకు సాగింది. అక్కడ తొమ్మిది రోజుల పాటు స్వామివారి విగ్రహాలు భక్తుల దర్శనార్థంగా ఉంచుతారు. ఆ తర్వాత మళ్లీ జగన్నాథ ఆలయానికి తీసుకొచ్చి, రెండు రోజులు బయట ఉంచి చివరగా 11వ రోజు గర్భగుడిలోకి ప్రవేశపెడతారు.
పూరీలో రథయాత్ర ప్రారంభమైన సమయానికే ఇక్కడ కూడా అదే విధంగా ప్రారంభించడం విశేషం. పూర్వజన్మ సుకృతంగా భావించే ఈ దృశ్యాన్ని భక్తులు ఎంతో భక్తిశ్రద్ధలతో తిలకించారు. భద్రత కోసం పోలీసులు విస్తృత బందోబస్తు చేపట్టారు.
ఇక్కడ రథాలకు ప్రత్యేక పేర్లు ఉన్నాయి – బలరాముని రథం ‘తాళధ్వజం’, సుభద్ర రథం ‘దర్పదళన్’, జగన్నాథుని రథం ‘నందిఘోష’గా పిలుస్తారు. ప్రతి రథానికీ ప్రత్యేక రంగులు, చక్రాల సంఖ్యలు, తాడుల పేర్లు ఉండడం విశేషం. అనురాగానికి ప్రతీకగా అన్నచెల్లెళ్ల సంబంధాన్ని ప్రతిబింబించేలా ఈ ఉత్సవం సాగింది.
ఈ విధంగా పూరీ సంప్రదాయాన్ని అనుసరిస్తూ హైదరాబాద్లోని జగన్నాథ ఆలయంలో నిర్వహించిన రథయాత్ర భక్తుల మనసులను మైమరపింపజేసింది.
Also Read : Coconut Water Interesting Uses : ఇవి కొలెస్ట్రాల్ను పెంచుతాయా? రోజూ కొబ్బరి నీళ్లు తాగడం వల్ల ఏమవుతుంది?