ముంబై : క్యాన్సర్ పోరాట సమయంలో తనకు లభించిన మానసిక బలం గురించి మాధురీ దీక్షిత్‌తో సోనాలీ బింద్రే మనసు విప్పి మాట్లాడారు. మాధురీ దీక్షిత్ హోస్ట్ చేస్తున్న కౌన్ బనేగా కరోడ్‌పతి కార్యక్రమ ప్రత్యేక ఎపిసోడ్‌లో సోనాలీ తన శరీరాన్ని ప్రేమతో చూసుకోవడం, జీవితంలోని క్లిష్ట దశలో నేర్చుకున్న పాఠాల గురించి వివరించారు. తన క్యాన్సర్ ప్రయాణం గురించి, అలాగే ఆ అనుభవాన్ని కేవలం గెలవాల్సిన యుద్ధంగా కాకుండా తన శరీరాన్ని అర్థం చేసుకునే అవకాశంగా ఎందుకు భావించారో వెల్లడించారు. సంభాషణ సందర్భంగా క్యాన్సర్ పోరాటంలో సోనాలీ ప్రదర్శించిన ధైర్యాన్ని , ఆ క్లిష్ట సమయాన్ని ఎదుర్కొన్న తీరును మాధురి ప్రశంసించారు. మీరు ఎన్నో విభిన్న అనుభవాలను ఎదుర్కొన్నారు. క్యాన్సర్‌ను జయించినప్పుడు మీలోని ఒక కొత్త కోణాన్ని తాము చూశాం. ఒక బలమైన సోనాలీగా మీరు బయటకు రావడం ఆశ్చ‌ర్యం క‌లిగించింద‌ని పేర్కొన్నారు.
మాధురి మాటలకు స్పందిస్తూ సోనాలీ తాను ఆ అనుభవాన్ని ఎప్పుడూ గెలవాల్సిన యుద్ధంగా చూడలేదని అన్నారు. దానికి బదులుగా తన శరీరాన్ని అర్థం చేసుకోవడం , తాను ఎదుర్కొంటున్న పరిస్థితుల నుండి పాఠాలు నేర్చుకోవడంపై దృష్టి సారించానని చెప్పారు. నిజానికి ఎవరైనా క్యాన్సర్‌ను జయించారని మనం తరచుగా అంటుంటాం కదా అని పేర్కొన్నారు. సరదా మాటలు పక్కన పెడితే, మనం ఇవన్నీ నవ్వుతూ, జోకులు వేస్తూ చెబుతుంటాం. కానీ ఆ సమయంలో, నా అసలు ఉద్దేశ్యం దానిని జయించడం మాత్రమే కాదు. అసలు ఇది ఎందుకు జరుగుతోంది, దీని నుండి నేను ఏమి నేర్చుకోగలను అని అర్థం చేసుకోవడమే నా లక్ష్యం. నమ్మండి, నేను దాని నుండి నిజంగా చాలా విషయాలు నేర్చుకున్నాను. నేను ఆ విషయాన్ని అలాగే చూశాన‌ని అన్నారు.
పోరాటం , విజయం సాధించడం వంటి పదజాలం వాడటం వల్ల కొన్నిసార్లు మన సొంత శరీరం పట్లనే ఒక రకమైన సంఘర్షణ భావన కలుగుతుందని సోనాలి పేర్కొన్నారు. ఆ క్లిష్ట సమయంలో తాను అనుసరించిన విధానం గురించి చెబుతూ తీవ్రమైన బాధను అనుభవిస్తున్నప్పటికీ తన శరీరాన్ని ప్రేమతో, కరుణతో చూసుకోవాలని నిర్ణయించుకున్నట్లు సోనాలి బెంద్రే తెలిపారు.