టీటీడీ గోశాలకు వంశ పారంపర్యంగా వరి గడ్డి సరఫరా

తిరుపతి : తిరుమల తిరుపతి దేవస్థానాల గోశాలలోని గోవుల పోషణకు అమలాపురానికి చెందిన శ్రీనివాసా సేవా ట్రస్ట్ చైర్మన్ నిమ్మకాయల సత్యనారాయణ మరోసారి ఉదారంగా సహకారం అందించారు. ట్రస్ట్ తరఫున 100 టన్నుల వరి గడ్డిని విరాళంగా అందించడంతో పాటు, తమ వంశపారంపర్య సేవగా టీటీడీ గోశాలకు అవసరమైన వరి గడ్డిని నిరంతరం సరఫరా చేసేందుకు సంసిద్ధత వ్యక్తం చేశారు. ఇందుకు అవసరమైన ముందస్తు అనుమతులు మంజూరు చేయాలని టీటీడీని కోరారు. గతంలోనూ సత్యనారాయణ పలు సేవా కార్యక్రమాలు నిర్వహించారు. ఇటీవల రూ.15 లక్షల విలువైన 2,000 హెల్మెట్లపై శ్రీవారి లోగోను ముద్రించి టీటీడీ ఉద్యోగులకు పంపిణీ చేశారు.

అలాగే 2025లో 38 లారీల వరి గడ్డిని 2026 మే నెలలో జగ్గంపేటకు చెందిన శ్రీ జ్యోతుల నెహ్రూ ఫౌండేషన్, శ్రీనివాసా సేవా ట్రస్ట్ సంయుక్తంగా 180 లారీల ద్వారా 1,600 టన్నుల ఎండు వరి గడ్డిని టీటీడీ గోశాలలకు అందించారు. జగ్గంపేట ఎమ్మెల్యే, టిటిడి మాజీ బోర్డు సభ్యులు జ్యోతుల నెహ్రూ సమక్షంలో అందించిన ఈ గడ్డి మూడు నెలల పాటు గోవుల పోషణకు ఉపయోగపడింది. ఈ సందర్భంగా శ్రీవారి సేవతో పాటు గోసంరక్షణకు ప్రాధాన్యతనిస్తూ నిరంతరం సహకారం అందిస్తున్న నిమ్మకాయల సత్యనారాయణ సేవలను శ్రీ వేంకటేశ్వర గోసంరక్షణశాల డైరెక్టర్ డా. ఏ.వి.ఎన్. శివకుమార్ అభినందించారు. గతంలో సహకారం అందించిన జ్యోతుల నెహ్రూ ఫౌండేషన్, జగ్గంపేట శ్రీనివాసా సేవా ట్రస్ట్, అమలాపురం నిర్వాహకులకు కృతజ్ఞతలు తెలిపారు.

శ్రీవారి భక్తులందరూ గోవింద గోసేవ కార్యక్రమంలో భాగస్వాములై తమ వంతు విరాళాలు అందించి గోసేవా భాగ్యాన్ని పొందాలని ఆయన విజ్ఞప్తి చేశారు.