న్యూఢిల్లీ : భారత దేశంలో మోదీ స‌ర్కార్ కొలువు తీరాక ప్రధాన సంస్థ‌ల‌ను, ఆదాయ వ‌న‌రులు క‌లిగిన బ్యాంకుల‌ను, కంపెనీల‌ను, ప‌రిశ్ర‌మ‌ల‌ను నిర్వీర్యం చేయ‌డం లేదా అమ్మ‌కానికి పెట్ట‌డం, లేదా మోదీ త‌న అనుయాయుల‌కు క‌ట్ట‌బెట్ట‌డం చేస్తూ వ‌స్తున్నారు. తాజాగా ఆనాడు నెహ్రూ కాలంలో ప్రారంభ‌మైన ప్ర‌ముఖ ఐడీబీఐ బ్యాంకును సుమారు ₹52,878 కోట్లకు కెనడాకు చెందిన ఫెయిర్‌ఫాక్స్ ఫైనాన్షియల్ హోల్డింగ్స్‌కు 60.72 శాతం వాటాను విక్రయించేందుకు రెడీ అయ్యింది. ఐడిబిఐ బ్యాంకు వ్యూహాత్మక పునర్‌వ్యవస్థీకరణకు కేంద్ర కేబినెట్ ఆమోదం తెలిపింది. ప్రభుత్వం , ఎల్ఐసి మైనారిటీ వాటాలను కలిగి ఉంటాయి, ఈ లావాదేవీ మార్చి 2027 నాటికి పూర్తి అవుతుందని భావిస్తున్నారు.
దీనిలో భాగంగా, కెనడాకు చెందిన ఫెయిర్‌ఫాక్స్ ఫైనాన్షియల్ హోల్డింగ్స్‌కు సుమారు ₹52,878 కోట్లకు 60.72 శాతం వాటాను విక్రయించేందుకు అనుమతి లభించింది. ఈ ఒప్పందం ద్వారా బ్యాంక్‌లోని మెజారిటీ యాజమాన్యం, నిర్వహణ నియంత్రణ కెనడియన్ పెట్టుబడి సంస్థకు బదిలీ అవుతాయి. ఇది భారత బ్యాంకింగ్ రంగంలో ఒక ప్రధాన పరిణామంగా నిలుస్తుంది. భారత-కెనడియన్ బిలియనీర్ ప్రేమ్ వాట్సా నేతృత్వంలోని ఫెయిర్‌ఫాక్స్, సుదీర్ఘ విక్రయ ప్రక్రియ తర్వాత విజయవంతమైన బిడ్డర్‌గా నిలిచింది.
ఈ లావాదేవీని ఆర్థిక రంగంలో భారతదేశపు అతిపెద్ద విదేశీ ప్రత్యక్ష పెట్టుబడిగా అభివర్ణిస్తున్నారు. ఆర్థిక మంత్రి నిర్మలా సీతారామన్ ఈ నిర్ణయాన్ని ఒక వ్యూహాత్మక పునర్‌వ్యవస్థీకరణగా అభివర్ణించారు. ఈ బ్యాంకులో ప్రభుత్వం, లైఫ్ ఇన్సూరెన్స్ కార్పొరేషన్ ఆఫ్ ఇండియా మైనారిటీ వాటాలను కొనసాగిస్తాయని ఆమె పేర్కొన్నారు. ఈ ప్రకటన, చాలా సంవత్సరాల క్రితం ప్రారంభమై పలు ఆలస్యాలను ఎదుర్కొన్న ప్రక్రియకు కొత్త ఊపునిచ్చింది.
