హైదరాబాద్ : భారత దేశ చరిత్రలో ఏప్రిల్ 14వ తేదీకి ప్రత్యేకత ఉంది. ఎందుకంటే దేశానికి మార్గ నిర్దేశనం చేస్తూ వచ్చిన రాజ్యాంగ నిర్మాత డాక్టర్ బాబా సాహెబ్ అంబేద్కర్ పుట్టిన రోజు. ఆయన మన మధ్య నుంచి వెళ్లి పోయినా నేటికీ ప్రభావితం చేస్తూనే ఉన్నారు. కోట్లాది మంది అణగారిన , బహుజన, పేదల ఆశా జ్యోతిగా ఇప్పటికీ వెలుగొందుతూనే వస్తున్నారు డాక్టర్ బాబా సాహెబ్ అంబేద్కర్. భారత రాజ్యాంగ పితామహుడు”గా ప్రసిద్ధి చెందిన అంబేద్కర్ ఒక దార్శనిక నాయకుడు, సాంఘిక సంస్కర్త , సమానత్వం కోసం అవిశ్రాంతంగా కృషి చేసిన వ్యక్తి. ఆయన వారసత్వం సరిహద్దులను దాటి, న్యాయం, విద్య ,మానవ గౌరవం కోసం ఉద్యమాలకు స్ఫూర్తినిచ్చింది.
1891లో ఒక దళిత కుటుంబంలో జన్మించిన అంబేద్కర్ తీవ్రమైన కుల వివక్షను ఎదుర్కొన్నారు. విద్య, ప్రజా నీటి సౌకర్యం వంటి ప్రాథమిక హక్కులు నిరాకరించ బడినప్పటికీ, ఆయన అకుంఠిత దీక్షతో ఉన్నత స్థాయికి ఎదిగారు. అంబేద్కర్ విదేశాలలో చదువుకున్న తొలి దళితులలో ఒకరిగా నిలిచారు. ఆయన కొలంబియా విశ్వ విద్యాలయం, లండన్ స్కూల్ ఆఫ్ ఎకనామిక్స్ నుండి డిగ్రీలు పొందారు.
ఆయన శక్తివంతమైన నినాదం ఎప్పటికీ చిరస్థాయిగా ప్రజల నోళ్లల్లో నానుతూనే ఉంటుంది. చదువుకోండి, పోరాడండి, సంఘటితం అవ్వండి. భారతదేశ వ్యాప్తంగా సామాజిక సంస్కరణలకు ఒక పిలుపుగా మారింది. భీమరావు అంబేద్కర్ జయంతి వేడుకలు కాలక్రమేణా చిన్న చిన్న సమావేశాల నుండి దేశ వ్యాప్తంగా జరుపుకునే రోజుగా అభివృద్ధి చెందాయి. డాక్టర్ బి.ఆర్. అంబేద్కర్ జన్మ దినోత్సవాన్ని తొలిసారిగా బహిరంగంగా జరుపుకునే కార్యక్రమాన్ని సంఘ సేవకురాలు జనార్దన్ సదాశివ్ రణపీసాయ్ 1928 ఏప్రిల్ 14న పూణేలో నిర్వహించారు. ఈ కార్యక్రమంతో ప్రతి సంవత్సరం అంబేద్కర్ ను గౌరవించే సంప్రదాయం మొదలైంది.
1990లో డాక్టర్ అంబేద్కర్ కు భారతరత్న (భారతదేశ అత్యున్నత పౌర పురస్కారం) ప్రదానం చేశారు. అలాగే, 1990–91 సంవత్సరాన్ని “సామాజిక న్యాయ సంవత్సరం”గా ప్రకటించారు. ఈ చర్యల ఫలితంగా మరిన్ని రాష్ట్రాలు ఆయన పుట్టిన రోజును అనధికారికంగా సెలవు దినంగా ప్రకటించాయి. ఇటీవలి సంవత్సరాలలో, కేంద్ర ప్రభుత్వం ఈ రోజును గుర్తించడం ప్రారంభించింది. అధికారికంగా జాతీయ సెలవు దినం ప్రకటించనప్పటికీ, చాలా ప్రభుత్వ కార్యాలయాలు ఇప్పుడు ఏప్రిల్ 14వ తేదీని సెలవు దినంగా పాటిస్తున్నాయి.