తిరుమల : టీటీడీ ఉద్యోగుల హౌస్ సైట్లకు సంబంధించి కొన్నేళ్లుగా పెండింగ్లో ఉన్న సమస్యకు పరిష్కారం లభించే దిశగా కీలక అడుగు పడిందని టీటీడీ చైర్మన్ బీ.ఆర్.నాయుడు తెలిపారు. ఉద్యోగుల సంక్షేమాన్ని దృష్టిలో ఉంచుకుని ఈ అంశంపై ముఖ్యమంత్రి నారా చంద్రబాబు నాయుడు సానుకూలంగా స్పందించారని, ఈ మేరకు వెంటనే చర్యలు తీసుకోవాలని ఆదేశించారని, ఇది ఎంతో సంతోషకరమని ఆయన అన్నారు. తిరుమలలోని తన క్యాంపు కార్యాలయంలో టీటీడీ ఉద్యోగుల హౌస్ సైట్ల అంశంపై బోర్డు సభ్యులు, ఉద్యోగ సంఘాల నాయకులతో చైర్మన్ సమావేశమయ్యారు .ఈ సందర్భంగా చైర్మన్ మీడియాతో మాట్లాడుతూ ఉద్యోగుల హౌస్ సైట్ల అంశానికి సంబంధించి సుమారు రూ.230 కోట్ల వ్యయం అవుతుందని చెప్పారు. సైట్లను పరిశీలించిన అనంతరం అనుభవం ఉన్న వ్యక్తులతో ప్రత్యేకంగా సబ్ కమిటీని ఏర్పాటు చేశామని చెప్పారు. సబ్కమిటీ ఈ అంశాన్ని కూలంకషంగా పరిశీలించి సమగ్ర ప్రతిపాదనను అందించిందని, ఆ ప్రతిపాదనను టీటీడీ పాలక మండలి సభ్యులంతా ఏకగ్రీవంగా ఆమోదించారని చెప్పారు.
ఈ ప్రతిపాదనను ముఖ్యమంత్రి దృష్టికి తీసుకెళ్లేందుకు ఇటీవల బ్రహ్మోత్సవాల ఆహ్వాన పత్రిక అందించే సందర్భంగా ముఖ్యమంత్రిని కలిసినప్పుడు ఈ అంశంపై చర్చించామని తెలిపారు. ఉద్యోగుల సమస్యను పరిష్కరించేందుకు ముఖ్యమంత్రి వెంటనే చర్యలు తీసుకోవాలని సూచించడంతో పాటు, టీటీడీ ఉద్యోగుల కోసం ఈ కార్యక్రమాన్ని చేపట్టాలని స్పష్టంగా ఆదేశించారని చెప్పారు. దీనికి తన పూర్తి సహకారం ఉంటుందని ముఖ్యమంత్రి హామీ ఇవ్వడం ఉద్యోగుల సంక్షేమం పట్ల ఆయనకున్న చిత్తశుద్ధికి నిదర్శనమని చైర్మన్ పేర్కొన్నారు.
బ్రహ్మోత్సవాల ఏర్పాట్లలో అధికారులు, సిబ్బంది ప్రస్తుతం ఎంతో బిజీగా ఉన్నందున, బ్రహ్మోత్సవాలు పూర్తయిన వెంటనే ఉద్యోగుల హౌస్ సైట్లకు సంబంధించిన కార్యక్రమాన్ని కార్యరూపంలోకి తీసుకు రావడానికి చర్యలు ప్రారంభిస్తామని తెలిపారు. టీటీడీ ఉద్యోగుల కోసం ప్రతిపాదించిన ఇంటిగ్రేటెడ్ టౌన్షిప్ కూడా ముఖ్యమంత్రి ప్రాధాన్యంగా భావిస్తున్న ప్రాజెక్టు అని చైర్మన్ తెలిపారు. గతంలోనే ఈ ప్రాజెక్టుకు సంబంధించిన ప్రతిపాదనలు, అనుమతులు ఉన్నాయని, ప్రస్తుతం దీనిని ఫేజ్-1, ఫేజ్-2గా చేపట్టేలా అధికారులు చర్యలు తీసుకోవాలని సూచించారని చెప్పారు .తిరుమలలోని పాత గెస్ట్హౌస్ల స్థానంలో కొత్త గెస్ట్హౌస్ల నిర్మాణానికి సంబంధించి కూడా ముఖ్యమంత్రి పలు సూచనలు చేశారని చైర్మన్ తెలిపారు. ఏ గెస్ట్హౌస్ను అయితే తొలగిస్తామో, అదే ప్రదేశంలో అదే నమూనాలో కొత్త గెస్ట్హౌస్ను టీటీడీ ఆధ్వర్యంలోనే నిర్మించాలని, ప్రైవేట్ సంస్థలకు అప్పగించరాదని ముఖ్యమంత్రి స్పష్టమైన ఆదేశాలు ఇచ్చారని చెప్పారు. తిరుమలలో వసతి సౌకర్యాల విషయంలో అనవసరమైన కాంట్రాక్టర్ల వ్యవస్థ ఉండకూడదని, టీటీడీ స్వయంగా నిర్మించి నిర్వహించే విధానానికి ప్రాధాన్యం ఇవ్వాలని ముఖ్యమంత్రి సూచించారని తెలిపారు. అదేవిధంగా అవసరం లేని విధంగా కొత్త గదులను అదనంగా నిర్మించ కూడదని కూడా ముఖ్యమంత్రి ఆదేశించారని చైర్మన్ వెల్లడించారు.