అమరావతి : ఏపీ డిప్యూటీ సీఎం పవన్ కళ్యాణ్ వాక్ స్వేచ్ఛపై సంచలన వ్యాఖ్యలు చేశారు. సోషల్ మీడియాలో అభ్యంతరకరమైన, అసభ్యకరమైన కంటెంట్ను పోస్ట్ చేశారనే ఆరోపణలపై పిఠాపురం , ఏలూరుకు చెందిన పలువురిపై పోలీసులు కేసులు నమోదు చేశారు. ఈ నేపథ్యంలో డిప్యూటీ సీఎం స్పందించారు. తన కుమార్తెలపై అసభ్యకరమైన పోస్ట్లు పెట్టారనే ఆరోపణలు ఎదుర్కొంటున్న వ్యక్తులను అదుపులోకి తీసుకున్నారు. వాక్ స్వేచ్ఛ అనేది ప్రాథమిక రాజ్యాంగ హక్కు అయినప్పటికీ, అది ఇతరులను దూషించడం, బెదిరించడం, పరువు తీయడం లేదా వేధించడం వరకు విస్తరించదని ఆయన స్పష్టం చేశారు. పిఠాపురం పోలీసుల ప్రకారం, ఆరోపిత అసభ్యకర పోస్ట్లపై వచ్చిన ఫిర్యాదుల మేరకు చర్యలు ప్రారంభమయ్యాయి . ఆ కంటెంట్కు సంబంధించిన సోషల్ మీడియా ఖాతాలపై అధికారులు దర్యాప్తు చేస్తున్నారు. దర్యాప్తు ఫలితాల ఆధారంగా తదుపరి చట్టపరమైన చర్యలు తీసుకునే అవకాశం ఉంది.
కాగా, సోషల్ మీడియాలో పవన్ కళ్యాణ్పై అవమానకరమైన వ్యాఖ్యలు చేశారనే ఆరోపణలతో అరెస్టయిన సోషల్ మీడియా కార్యకర్త ‘ప్రశ్న రావణ్’కు పిఠాపురంలోని స్థానిక కోర్టు బెయిల్ మంజూరు చేసింది. అయితే, కాకినాడ జిల్లాలోని సర్వవరం పోలీస్ స్టేషన్లో గతంలో నమోదైన మరో కేసులో అతన్ని తిరిగి పోలీసులు అదుపులోకి తీసుకున్నారని పిఠాపురం టౌన్ సర్కిల్ ఇన్స్పెక్టర్ తెలిపారు . వాక్ స్వేచ్ఛను రాజ్యాంగ , చట్టపరమైన పరిమితులకు లోబడి వినియోగించు కోవాలని పవన్ కళ్యాణ్ నొక్కి చెప్పారు. ఈ రోజు నేను ప్రతి పౌరుడికి సంబంధించిన ఒక అంశం గురించి మాట్లాడాలని అనుకుంటున్నాను. సోషల్ మీడియా మన దైనందిన జీవితంలో ఒక భాగంగా మారింది. మన అభిప్రాయాలను వ్యక్తం చేయడానికి, ప్రజా సమస్యలను లేవనెత్తడానికి, ప్రజలతో మమేకం కావడానికి , ప్రభుత్వాలను జవాబుదారీగా ఉంచడానికి ఇది ఒక శక్తివంతమైన వేదిక. వాక్ స్వేచ్ఛ, భావప్రకటన స్వేచ్ఛ అనేది మన రాజ్యాంగం , ప్రభుత్వం కల్పించిన ప్రాథమిక హక్కు. మా ప్రభుత్వం ఆ హక్కును పూర్తిగా గౌరవిస్తుంది అని స్పష్టం చేశారు.
