RBI : భారత రిజర్వ్ బ్యాంక్ (ఆర్బీఐ) మహారాష్ట్రలోని సతారా జిల్లాకు చెందిన జిజామాతా మహిళా సహకార బ్యాంక్ లైసెన్స్ను రద్దు చేసింది. ఆర్థిక పరంగా ఈ బ్యాంక్ నిలదొక్కుకోలేకపోవడం, తగిన మూలధనం లేకపోవడం మరియు లాభదాయకత దిశలో అవకాశాలు కనిపించకపోవడం వంటి కారణాలతో ఈ నిర్ణయం తీసుకున్నట్లు ఆర్బీఐ (RBI) పేర్కొంది.
ఇప్పటికే 2025 అక్టోబర్ 7న ఈ బ్యాంకు కార్యకలాపాలు అధికారికంగా నిలిపివేయబడ్డాయి. దీంతో ఖాతాదారులు ఇకపై బ్యాంకులో కొత్తగా డిపాజిట్లు చేయడం, పాత ఖాతాల నుంచి నగదు ఉపసంహరణ చేయడం సాధ్యం కాదు.
RBI Shocking
రెండవసారి లైసెన్స్ రద్దు చేయడం ఇదే మొదటిసారి కాదు. 2016 జూన్ 30న రిజర్వ్ బ్యాంక్ ఈ బ్యాంకు లైసెన్స్ను రద్దు చేసినప్పటికీ, 2019 అక్టోబర్ 23న అప్పీల్ తర్వాత తిరిగి అనుమతి ఇచ్చింది. అయితే, ఆర్థిక లావాదేవీలలో పారదర్శకతను పరిశీలించడానికి 2013–14 సంవత్సరాల ఆర్థిక వ్యవహారాలపై ఫోరెన్సిక్ ఆడిట్ ఆదేశించినా, బ్యాంకు సహకారం లేకపోవడంతో ఆ ప్రక్రియ పూర్తికాలేదు.
రిజర్వ్ బ్యాంక్ వెల్లడించిన వివరాల ప్రకారం, జిజామాతా మహిళా సహకార బ్యాంక్ ఆర్థిక స్థితి క్రమంగా దిగజారుతూ రావడంతో, లైసెన్స్ రద్దు తప్ప మరో మార్గం లేకపోయింది. ప్రస్తుతం బ్యాంకు వద్ద ఉన్న నిధులు, డిపాజిటర్లకు మొత్తం మొత్తాలను తిరిగి చెల్లించడానికి తగినంత కావని ఆర్బీఐ (RBI) స్పష్టం చేసింది.
డిపాజిటర్ల పరిరక్షణ కోసం, డిపాజిట్ ఇన్సూరెన్స్ అండ్ క్రెడిట్ గ్యారంటీ కార్పొరేషన్ (DICGC) ద్వారా ప్రతి ఖాతాదారుడు తన ఖాతాలో ఉన్న మొత్తానికి గరిష్టంగా రూ.5 లక్షల వరకు క్లెయిమ్ చేసుకోవచ్చని ఆర్బీఐ తెలిపింది.
ఆర్థిక నిపుణుల ప్రకారం, ఈ సంఘటన చిన్నస్థాయి డిపాజిటర్లలో భయాందోళనలకు దారితీసే అవకాశం ఉంది. సహకార బ్యాంకులు ఆర్థిక నియంత్రణలు, పారదర్శకత మరియు బాధ్యతాయుత వ్యవస్థలను కచ్చితంగా పాటించకపోతే ఇలాంటి పరిణామాలు మరల చోటు చేసుకునే అవకాశం ఉందని వారు హెచ్చరించారు.
ఆర్బీఐ ఈ చర్యతో బ్యాంకింగ్ రంగంలో క్రమశిక్షణ, పారదర్శకత, మరియు ప్రజా నమ్మకానికి ప్రాధాన్యం ఎంత ముఖ్యమో మరోసారి స్పష్టం చేసింది.
Also Read : Modi-Starmer Important Meet : మోదీ–స్టార్మర్ భేటీ: కీలక ఒప్పందాలకు నాంది
