హైదరాబాద్ : తెలుగు సినీ రంగానికి సంబంధించి ఇడుపు కాయితం చిత్రం సంచలనంగా మారంది. ఆంధ్ర-తెలంగాణ సోషల్ మీడియా వివాదానికి దారితీసిందా? అవుననే అంటున్నారు తెలంగాణ సినీ రంగానికి చెందిన వారు. ప్రియదర్శి , నాగ దుర్గ ప్రధాన పాత్రల్లో వంశీ రెడ్డి దొండపాటి దర్శకత్వంలో రూపొందుతున్న ‘ఇడుపు కాయితం’ చిత్రం ప్రకటన ఊహించని విధంగా భాష , ప్రాంతీయ అస్తిత్వానికి సంబంధించిన చర్చగా మారింది. చిత్ర బృందం ఫస్ట్-లుక్ పోస్టర్ను విడుదల చేసిన వెంటనే, సోషల్ మీడియా వినియోగదారులలో ఒక వర్గం తెలంగాణ యాసతో కూడిన ఆ శీర్షికను ఎగతాళి చేసింది. కొందరు వ్యంగ్యంగా ఈ సినిమాను ఆంధ్ర భాషలోకి డబ్బింగ్ చేస్తారా? అని ప్రశ్నించారు. మరికొందరు ఆ యాసను సరైన తెలుగు”గా పరిగణించవచ్చా అని ప్రశ్నించడంతో, తెలంగాణ నెటిజన్ల నుండి తీవ్ర వ్యతిరేకత వ్యక్తమైంది.
దీనిపై ఘాటుగా స్పందించిన చాలా మంది దశాబ్దాలుగా తెలుగు సినిమా ప్రధానంగా కోస్తా ఆంధ్ర యాసలతోనే నడుస్తున్నా అటువంటి విమర్శలు రాలేదని గుర్తు చేశారు. ప్రాంతీయ యాసలు తెలుగు భాషలో అంతర్భాగమని, అవి సమాన గౌరవానికి అర్హమని వాదిస్తూ, ఈ వ్యాఖ్యలను భాషా అహంకారానికి , తెలంగాణ స్థానిక సంస్కృతి, పదజాలానికి అవమానంగా అభివర్ణించారు. శీర్షికపై వచ్చిన వ్యంగ్య వ్యాఖ్యలు నిరాశ పరిచాయని, ఈ వివాదం అనవసరంగా ఆంధ్ర-తెలంగాణ చర్చగా మారిందని నిర్మాత మధుర శ్రీధర్ రెడ్డి పేర్కొన్నారు. ఇడుపు కాయితం అంటే విడాకుల పత్రాలు అని అర్థం, ఇది తెలంగాణలో సాధారణంగా వాడే పదం. ఒకవేళ ప్రజలకు దీని అర్థం తెలియక పోతే, ఎగతాళి వ్యాఖ్యలు చేయడానికి బదులుగా మమ్మల్ని అడిగి తెలుసుకోవచ్చు అని పేర్కొన్నారు.