Rupee : విదేశీ పెట్టుబడుల ఉపసంహరణలు కొనసాగుతుండటం, రిస్క్-ఆఫ్ సెంటిమెంట్స్ పెరగడం వల్ల సోమవారం రూపాయి (Rupee) మరింత బలహీనమై డాలర్తో పోలిస్తే 7 పైసలు క్షీణించి 88.79 వద్ద ముగిసింది. ఇది రూపాయి ఇప్పటి వరకు నమోదు చేసిన అత్యల్ప ముగింపు స్థాయి.
Indian Rupee Falls
ఇంటర్బ్యాంక్ ఫారెక్స్ మార్కెట్లో రూపాయి (Rupee) 88.69 వద్ద ప్రారంభమై, చివరికి 88.79 వద్ద స్థిరపడింది. గత శుక్రవారం మాత్రం రూపాయి 4 పైసలు బలపడి 88.72 వద్ద ముగిసింది. సెప్టెంబర్ 25న రూపాయి 88.76 వద్ద చరిత్రాత్మక కనిష్టానికి చేరిన విషయం గమనార్హం.
ఫారెక్స్ నిపుణులు చెబుతున్నదాని ప్రకారం, అంతర్జాతీయ వాణిజ్య అనిశ్చితులు, అమెరికా వీసా ఫీజు పెంపు వల్ల ఐటీ రంగంపై వచ్చే ప్రభావం పెట్టుబడిదారులను ఆందోళనకు గురి చేస్తున్నాయి. అంతేకాక, అక్టోబర్ 1న జరిగే రిజర్వ్ బ్యాంక్ ఆఫ్ ఇండియా ద్రవ్య విధాన సమావేశం ఫలితాలు రూపాయి, ప్రభుత్వ బాండ్లపై ప్రభావం చూపవచ్చని అంచనా.
మిరాయ్ అసెట్ షేర్ఖాన్ కరెన్సీ రీసెర్చ్ విశ్లేషకుడు అనుజ్ చౌధరి మాట్లాడుతూ,
“దేశీయ మార్కెట్లు బలహీనంగా ఉండటం, ముడి చమురు ధరలు ఎగబాకడం రూపాయిపై ఒత్తిడిని పెంచవచ్చు. నెలాఖరులో దిగుమతిదారుల డాలర్ డిమాండ్ కూడా ప్రభావితం చేసే అవకాశం ఉంది. అయితే అమెరికా డాలర్ బలహీనతతో పాటు ఆర్బీఐ జోక్యం రూపాయికి కొంత మద్దతు ఇవ్వవచ్చు” అని అన్నారు.
అదే సమయంలో, డాలర్ సూచీ 0.19% పడిపోవడంతో 97.96 వద్ద, అలాగే బ్రెంట్ క్రూడ్ ధర 1.37% తగ్గి బ్యారెల్కు $69.17 వద్ద ట్రేడవుతున్నాయి.
దేశీయ ఈక్విటీ మార్కెట్లలో కూడా ప్రతికూలత కనిపించింది. సెన్సెక్స్ 61.52 పాయింట్లు క్షీణించి 80,364.94 వద్ద, నిఫ్టీ 19.80 పాయింట్లు పడిపడి 24,634.90 వద్ద ముగిశాయి.
విదేశీ సంస్థాగత పెట్టుబడిదారులు (FIIs) సెప్టెంబర్ 26న రూ.5,687.58 కోట్లు విలువైన షేర్లను విక్రయించారు అని ఎక్స్చేంజ్ డేటా చూపిస్తోంది.
ఇక, అమెరికా ప్రభుత్వం అక్టోబర్ 1 నుంచి భారత ఔషధ ఉత్పత్తులపై 100% సుంకం విధించనున్నట్లు ప్రకటించింది. అయితే అమెరికాలో ఉత్పత్తి యూనిట్లు ఏర్పాటు చేస్తున్న ఫార్మా సంస్థలకు మాత్రం మినహాయింపు ఇచ్చింది.
రిజర్వ్ బ్యాంక్ తాజాగా విడుదల చేసిన గణాంకాల ప్రకారం, సెప్టెంబర్ 19తో ముగిసిన వారంలో దేశ విదేశీ మారక నిల్వలు $396 మిలియన్లు తగ్గి $702.57 బిలియన్లకు పడిపోయాయి.
Also Read : Moody’s Sensational : భారత్ క్రెడిట్ రేటింగ్ను ‘స్థిరంగా’ ఉంచిన మూడీస్
