Ray Dalio : అమెరికా పెరుగుతున్న అప్పుల భారం దేశ ఆర్థిక వ్యవస్థను ప్రమాదకర స్థితికి నెడుతోందని బిలియనీర్ హెజ్ ఫండ్ మేనేజర్ రే డాలియో (Ray Dalio) తీవ్ర హెచ్చరికలు జారీ చేశారు. అప్పుల సరఫరా, డిమాండ్ను మించిపోతే దేశం తిరిగి సరిదిద్దలేని సంక్షోభాన్ని ఎదుర్కోవాల్సి వస్తుందని ఆయన స్పష్టం చేశారు.
Ray Dalio – ఆర్థిక లెక్కలు ఆందోళనకరం
ప్రొఫెసర్ స్కాట్ గ్యాలోవేతో చేసిన పాడ్కాస్ట్లో మాట్లాడుతూ డాలియో, “ఈ సంవత్సరం అమెరికా ప్రభుత్వం దాదాపు 7 ట్రిలియన్ డాలర్లు ఖర్చు చేస్తుంది. కానీ ఆదాయం మాత్రం 5 ట్రిలియన్ డాలర్లు మాత్రమే. అంటే సంపాదించినదానికంటే 40% ఎక్కువ ఖర్చు అవుతోంది. అప్పు ఇప్పుడు ప్రభుత్వ వార్షిక ఆదాయానికి ఆరు రెట్లు పెరిగింది” అని వివరించారు.
రాబోయే ఏడాదిలో భారీ అప్పు అవసరం
డాలియో అంచనా ప్రకారం, వచ్చే ఏడాదిలో అమెరికా ప్రభుత్వం 12 ట్రిలియన్ డాలర్లకు పైగా అప్పు సమీకరించాల్సి ఉంటుంది. ఇందులో 9 ట్రిలియన్ డాలర్లు పాత అప్పులు తీర్చడానికి, మరో 2 ట్రిలియన్ డాలర్లు కొత్త లోటు భర్తీకి వెళ్ళనుంది. అదనంగా 1 ట్రిలియన్ డాలర్లు వడ్డీ చెల్లింపులకు ఖర్చవుతాయి. ఇది బడ్జెట్ లోటు సగం అన్నట్టే అని ఆయన చెప్పారు.
“రాజకీయ సమస్య”గా అభివర్ణన
డాలియో మాటల్లో, ఈ సమస్యను ఆర్థికవేత్తలు, విధానకర్తలు బాగా తెలుసుకున్నా పరిష్కారం మాత్రం రాజకీయ అడ్డంకుల్లో ఇరుక్కుపోయిందని అన్నారు. పన్నులు పెంచడం, ప్రభుత్వ వ్యయాలు తగ్గించడం తప్ప మరో మార్గం లేకపోయినా, ఎన్నికల్లో “పన్నులు పెంచం, మీ లబ్ధులు తగ్గించం” అని ఇచ్చిన హామీలు సమస్య పరిష్కారానికి అడ్డుకవుతున్నాయని ఆయన వ్యాఖ్యానించారు.
3% పరిష్కార సూచన
దేశీయ స్థూల ఉత్పత్తి (GDP)లో బడ్జెట్ లోటును 6–7% నుండి 3% వరకు తగ్గించడం అవసరమని డాలియో సూచించారు. దీని కోసం పన్నుల్లో 4% పెంపు, ఖర్చుల్లో 4% కోత అవసరమని తెలిపారు. ఇలా చేస్తే అప్పులపై వడ్డీ ఒత్తిడి తగ్గి వడ్డీ రేట్లు క్రమంగా పడిపోతాయని ఆయన విశ్లేషించారు. అయితే కృత్రిమంగా వడ్డీ రేట్లు తగ్గిస్తే బాండ్ కొనుగోలుదారులు వెనక్కు తగ్గే అవకాశం ఉందని ఆయన హెచ్చరించారు.
టారిఫ్ల ప్రభావంపై విశ్లేషణ
ప్రస్తుత ప్రభుత్వం టారిఫ్లను ఆదాయ వనరుగా, అమెరికా వ్యాపారాల రక్షణ సాధనంగా ఉపయోగిస్తున్నప్పటికీ, ఇది అప్పు సమస్యను పరిష్కరించలేదని డాలియో చెప్పారు. అప్పు పెరుగుతున్నకొద్దీ సరఫరా–డిమాండ్ సమతుల్యం మరింతగా కూలిపోతుందని ఆయన హెచ్చరించారు.
అమెరికా అప్పుల సమస్యను ఎదుర్కొనేందుకు రాజకీయపరంగా కఠిన నిర్ణయాలు తీసుకోకపోతే ప్రపంచం దేశంపై నమ్మకం కోల్పోయే ప్రమాదం ఉందని డాలియో స్పష్టం చేశారు.
Also Read : Cars Price Drop : 3 లక్షలకు పైగా తగ్గిన కార్ల ధరలు
