కేరళ : జాతీయ అవార్డు గ్రహీత, ప్రముఖ చలనచిత్ర దర్శకుడు ఆర్. శరత్ కన్నుమూశారు. మలయాళ చిత్రసీమలో దర్శకుడిగా, స్క్రీన్ రైటర్గా , కథకుడిగా తనదైన ముద్ర వేసిన శరత్ కేరళ సామాజిక, సాంస్కృతిక రంగాలకు చేసిన సేవలకు కూడా సుపరిచితులు. తిరువనంతపురంలోని ఒక ప్రైవేట్ ఆసుపత్రిలో ఆయన తుది శ్వాస విడిచారు. అనారోగ్య సమస్యలతో చికిత్స పొందుతూ సోమవారం ఆయన మరణించినట్లు పరిశ్రమ వర్గాలు తెలిపాయి. ఆయన వయసు 65 ఏళ్లు. ‘సాయాహ్నం’, ‘స్థితి’, ‘శీలవతి’, ‘బుద్ధనుమ్ చాప్లినుమ్ చిరిక్కున్ను’, ‘స్వయం’ ‘ప్యారడైజ్’ వంటి అనేక చిత్రాలకు ఆయన దర్శకత్వం వహించారు. ఇందిరా గాంధీ అవార్డును గెలుచుకున్న ఆయన చిత్రం ‘సాయాహ్నం’, 2000 సంవత్సరంలో ఏడు కేరళ రాష్ట్ర చలనచిత్ర అవార్డులను సొంతం చేసుకుంది. ఆయన రూపొందించిన ‘ది డిజైర్ – ఎ జర్నీ ఆఫ్ ఎ ఉమెన్’ చిత్రం 2011లో జెనీవా అంతర్జాతీయ చలన చిత్రోత్సవంలో ‘ఉత్తమ కథా చిత్రం’ అవార్డును గెలుచుకుంది.
‘అచింతే కథ’, ‘చుమార్ చిత్రంగల్’, ‘భూమిక్కోరు చరమ గీతం’ ‘మహాత్మా గాంధీ రోడ్’ వంటి లఘు చిత్రాలు కూడా ఆయన ఇతర రచనలలో ఉన్నాయి. రాజా రవివర్మ చిత్రలేఖనాల ఆధారంగా ఆయన రూపొందించిన డాక్యుమెంటరీ అంతర్జాతీయ గుర్తింపు పొందింది. కుడ్య చిత్రలేఖనాలపై చేసిన కృషికి గాను శరత్కు కేంద్ర ప్రభుత్వ జూనియర్ ఫెలోషిప్ లభించింది. భోపాల్ గ్యాస్ దుర్ఘటన ఆధారంగా ఆయన రూపొందించిన ‘బరియల్ ఆఫ్ డ్రీమ్స్’ చిత్రం కూడా జాతీయ స్థాయిలో గుర్తింపు పొందింది. కొల్లం జిల్లాలోని విలక్కుడిలో జన్మించిన శరత్, తిరువనంతపురంలోని మహాత్మా గాంధీ కళాశాలలో ఆంగ్లంలో డిగ్రీని, యూనివర్సిటీ కళాశాలలో పీజీని పూర్తి చేశారు. ఆ తర్వాత పూణేలోని ఫిల్మ్ అండ్ టెలివిజన్ ఇన్స్టిట్యూట్ ఆఫ్ ఇండియాలో ‘ఫిల్మ్ అప్రిసియేషన్’ కోర్సును పూర్తి చేశారు. ప్రభుత్వ ఉద్యోగంలో చేరడానికి ముందు, ఆయన ‘కేరళ కౌముది’ పత్రికలో జర్నలిస్టుగా పనిచేశారు. ఆయన 2021లో కేరళ ప్రభుత్వ ప్రజాసంబంధాల విభాగంలో డిప్యూటీ డైరెక్టర్గా పదవీ విరమణ చేశారు. ఆయనకు భార్య, ఇద్దరు కుమారులు ఉన్నారు. ఆయన మృతి పట్ల ‘ఫెఫ్కా’ డైరెక్టర్ల సంఘం సంతాపం వ్యక్తం చేసింది.