Trump : భారత ఐటీ పరిశ్రమ అభివృద్ధి నిరంతరంగా కొనసాగేందుకు ప్రభుత్వం పలు చర్యలు తీసుకుంటోందని కేంద్ర ఎలక్ట్రానిక్స్, ఐటీ శాఖ మంత్రి అశ్వినీ వైష్ణవ్ (Ashwini Vaishnaw) తెలిపారు. బహుళజాతి సంస్థలు, విదేశీ ప్రభుత్వాలతో నిరంతరం చర్చలు జరుపుతూ, దేశీయ ఐటీ రంగ భవిష్యత్తు సుస్థిరంగా ఉండేలా చర్యలు కొనసాగుతున్నాయని ఆయన స్పష్టం చేశారు.
Trump Tarrifs – Indian IT Minister Responds
జాతీయ మీడియాకు ఇచ్చిన ఇంటర్వ్యూలో మంత్రి మాట్లాడుతూ, “అమెరికా, యూరప్, జపాన్, ఇతర ఆసియా దేశాలతో సంప్రదింపులు కొనసాగిస్తున్నాం. భారత్లో గ్లోబల్ కేపబిలిటీ సెంటర్లు (GCC), సర్వీస్ కార్యకలాపాలు నడుపుతున్న బహుళజాతి సంస్థలతో కూడా నిత్యం చర్చలు జరుపుతున్నాం. ఐటీ రంగంలో వృద్ధి ఎప్పటిలాగే కొనసాగి, అధిక నాణ్యత గల ఉపాధి అవకాశాలు కల్పించేలా ప్రయత్నిస్తున్నాం” అని చెప్పారు.
Trump – ఐటీ రంగ ప్రాముఖ్యత
ప్రస్తుతం భారత ఐటీ పరిశ్రమ సుమారు 300 బిలియన్ డాలర్ల విలువతో ప్రపంచంలో కీలక స్థానాన్ని దక్కించుకుంది. ఈ రంగం ద్వారా 5.67 మిలియన్ మందికి పైగా ఉపాధి లభిస్తోంది. దేశీయ ఎగుమతుల్లో ఐటీ ఉత్పత్తులు, సేవలు ప్రధాన భాగాన్ని ఆక్రమిస్తున్నాయి. ముఖ్యంగా అమెరికా క్లయింట్లకు ఎక్కువగా ఐటీ సేవలు అందించడం వల్ల ఆ మార్కెట్పై ఆధారపడే పరిస్థితి ఏర్పడింది.
ట్రంప్ పరిపాలన వ్యాఖ్యల ప్రభావం
అమెరికాలోని ట్రంప్ ప్రభుత్వానికి చెందిన కీలక వర్గాలు “ఐటీ ఔట్సోర్సింగ్కి బ్రేకులు వేయాలి, స్థానికులకు ఉపాధి కల్పించాలి” అని వ్యాఖ్యానించడంతో భారత ఐటీ పరిశ్రమలో ఆందోళన వ్యక్తమవుతోంది. ఇటీవల అమెరికా అధ్యక్షుడి వాణిజ్య సలహాదారు పీటర్ నవారో భారత ఐటీ రంగాన్ని లక్ష్యంగా చేసుకుని, విదేశాల నుంచి వచ్చే ఐటీ సేవలపై సుంకాలు విధించాలనే ప్రతిపాదన చేయడంతో ఈ చర్చ మరింత తీవ్రతరమైంది. ఇది కార్యరూపం దాలిస్తే భారత ఐటీ రంగంపై గణనీయమైన ప్రభావం చూపే అవకాశం ఉందని నిపుణులు హెచ్చరిస్తున్నారు.
స్వయం సమృద్ధి వైపు భారత్
అయితే, ఐటీ ఎగుమతులపై భారత్ పూర్తిగా ఆధారపడటం లేదని మంత్రి వైష్ణవ్ స్పష్టం చేశారు. “దేశంలో ఎలక్ట్రానిక్స్ తయారీ విస్తృతంగా పెరిగింది. స్మార్ట్ఫోన్ మార్కెట్ వాటా గణనీయంగా పెరిగింది. మొత్తం సప్లై చైన్ భారత్లోనే ఏర్పడేలా చర్యలు తీసుకుంటున్నాం. ఉద్యోగాలను కాపాడుకోవడమే కాకుండా, దేశీయంగా కొత్త ఉపాధి అవకాశాలు సృష్టించేందుకు కృషి చేస్తున్నాం” అని తెలిపారు.
మొత్తం మీద, భారత ఐటీ పరిశ్రమను రక్షించేందుకు ప్రభుత్వం చురుకైన చర్యలు చేపడుతోందని, గ్లోబల్ ఒత్తిడుల మధ్య కూడా దేశీయంగా వృద్ధి కొనసాగుతుందని మంత్రి భరోసా ఇచ్చారు.
Also Read : Nirmala Sitharaman Strong Response : జీఎస్టీ రేట్ల తగ్గింపుతో ఆర్థిక వ్యవస్థ పెరుగుదల పై స్పందించిన కేంద్రం
