ONGC : ప్రభుత్వ రంగ చమురు, వాయు దిగ్గజ సంస్థ ఓయిల్ అండ్ నేచురల్ గ్యాస్ కార్పొరేషన్ (ONGC) షేర్లపై పెట్టుబడిదారులు పెద్దగా ఆసక్తి చూపడం లేదు. గత మూడేళ్లలో రూ.1.16 లక్షల కోట్ల లాభాలను సాధించినప్పటికీ, మార్కెట్లో ఈ సంస్థ విలువ తక్కువగా నమోదవుతోంది.
గత ఆర్థిక సంవత్సరంలో ఓఎన్జీసీ (ONGC) కన్సాలిడేటెడ్ లాభం రూ.38,329 కోట్లు, స్టాండ్ఎలోన్ లాభం రూ.35,610 కోట్లుగా నమోదైంది. పోలిస్తే, జొమాటో మాతృసంస్థ ఎటర్నల్ లిమిటెడ్ లాభం కేవలం రూ.697 కోట్లు మాత్రమే. అయినా కూడా మార్కెట్లో జొమాటో విలువ రూ.3.37 లక్షల కోట్లు కాగా, ఓఎన్జీసీ మార్కెట్ క్యాప్ రూ.3.10 లక్షల కోట్లుగా ఉంది.
ONGC – ఓఎన్జీసీ నుండి జొమాటో దాకా మారిన దశ
ఒకప్పుడు దేశీయ స్టాక్ మార్కెట్లో అగ్రస్థానంలో ఉన్న ఓఎన్జీసీ, ప్రస్తుతం వెనుకబడి పోయింది. పదమూడు సంవత్సరాల క్రితం రూ.2.44 లక్షల కోట్ల మార్కెట్ క్యాప్తో ఈ సంస్థ అగ్రస్థానంలో ఉండగా, ఇప్పుడు రూ.3.10 లక్షల కోట్లతో 25వ స్థానంలో ఉంది. ప్రస్తుతం రిలయన్స్ ఇండస్ట్రీస్ రూ.18.7 లక్షల కోట్ల మార్కెట్ క్యాప్తో మొదటి స్థానంలో, టీసీఎస్ రూ.10.95 లక్షల కోట్లతో నాలుగో స్థానంలో ఉన్నాయి.
అండర్ వాల్యుయేషన్ పై చర్చ
మార్కెట్ విశ్లేషకుల అభిప్రాయం ప్రకారం, ఓఎన్జీసీ షేర్ల ప్రస్తుత మార్కెట్ విలువ దాని అసలు ఆర్థిక స్థితిని ప్రతిబింబించడం లేదు. సంస్థకు అనుబంధంగా ఉన్న పలు కంపెనీలలో గణనీయమైన వాటాలు ఉన్నాయి — ఎంఆర్పీఎల్లో 71.63%, హెచ్పీసీఎల్లో 54.9%, ఐఓసీలో 14.20%, గెయిల్ ఇండియాలో 5% వాటా ఉంది. అదనంగా, విదేశీ చమురు, వాయు అన్వేషణలో పాల్గొంటున్న ఓఎన్జీసీ విదేశ్ కూడా పూర్తిగా ఓఎన్జీసీ ఆధీనంలో ఉంది.
ప్రస్తుత మార్కెట్ ధరల ప్రకారం ఈ అనుబంధ కంపెనీల్లో ఓఎన్జీసీ వాటాల విలువ రూ.1.07 లక్షల కోట్ల వరకు ఉంటుందని అంచనా. ఈ విలువలను పరిగణనలోకి తీసుకుంటే ఓఎన్జీసీ మార్కెట్ క్యాప్ కనీసం 33% వరకు పెరిగే అవకాశం ఉందని నిపుణులు అభిప్రాయపడుతున్నారు.
పీఎస్యూ కంపెనీ కావడం వల్లే పెట్టుబడిదారులు ఈ షేర్లను సరైన రీతిలో అంచనా వేయడంలో వెనుకబడి పోతున్నారని మార్కెట్ వర్గాలు విశ్లేషిస్తున్నాయి.
Also Read : Today Gold Price : నేడు భారీగా పెరిగిన పసిడి ధరలు