Gold : దేశీయ బంగారం మార్కెట్లో ధరలు మంగళవారం మరోసారి రికార్డు స్థాయిని తాకాయి. ఎంసీఎక్స్ (MCX) లో అక్టోబర్ డెలివరీ బంగారం (Gold) ఫ్యూచర్స్ ధర ₹520 పెరిగి, ప్రతి 10 గ్రాములకు ₹1,12,750 వద్ద ఆల్టైమ్ హై నమోదు చేసింది. అదే విధంగా డిసెంబర్ కాంట్రాక్ట్ ₹530 పెరిగి ₹1,13,750 చేరింది.
వెండి ధరలు కూడా ఎగిసిపడ్డాయి. డిసెంబర్ డెలివరీ వెండి ఫ్యూచర్స్ ₹461 పెరిగి కిలోకు ₹1,34,016 చేరగా, వచ్చే ఏడాది మార్చి డెలివరీ కాంట్రాక్ట్ ₹508 పెరిగి ₹1,35,397 వద్ద రికార్డు సృష్టించింది.
Gold – విశ్లేషకుల అంచనా
అమెరికా ఫెడరల్ రిజర్వ్ ఈ ఏడాది మొదటి సారి వడ్డీ రేట్లు 25 బేసిస్ పాయింట్లు తగ్గించడమే కాక, మరిన్ని తగ్గింపులు ఉండొచ్చన్న అంచనాలు మార్కెట్ సెంటిమెంట్ను బలపరిచాయి.
జియోపాలిటికల్ ఉద్రిక్తతలు, సెంట్రల్ బ్యాంకుల నిరంతర కొనుగోళ్లు, ETFలలో బలమైన ఇన్ఫ్లోలు కూడా బంగారం, వెండి ధరలకు తోడ్పడ్డాయి.
డాలర్ ఇండెక్స్ బలహీనత, రూపాయి పతనం కూడా దేశీయ మార్కెట్లో బంగారానికి మద్దతు ఇచ్చాయి.
మెహతా ఎక్విటీస్ లిమిటెడ్ కమోడిటీస్ వైస్-ప్రెసిడెంట్ రాహుల్ కలాంత్రి ప్రకారం, ‘‘బంగారం, వెండి పటిష్ట ర్యాలీ కొనసాగిస్తున్నాయి. బంగారం జీవితకాల గరిష్ఠాన్ని తాకగా, వెండి దాదాపు 15 ఏళ్లలోనే అత్యుత్తమ స్థాయికి చేరింది’’ అని అన్నారు.
అంతర్జాతీయ మార్కెట్లు
అంతర్జాతీయంగా డిసెంబర్ డెలివరీ గోల్డ్ ఫ్యూచర్స్ ధర $3,794.82 పౌన్సుకి చేరి కొత్త రికార్డు నెలకొల్పింది.
వెండి ధరలు మాత్రం డిసెంబర్ డెలివరీలో స్వల్పంగా తగ్గి $44.19 పౌన్సుకు చేరాయి.
రిలయన్స్ సెక్యూరిటీస్ సీనియర్ రీసెర్చ్ అనలిస్ట్ జిగర్ త్రివేది ప్రకారం, ఫెడరల్ రిజర్వ్ నుండి మరిన్ని రేటు కోతలపై ఆశలు బంగారం ధరలకు మద్దతు ఇస్తున్నాయి. ఆయన ప్రకారం, ‘‘ఈ ఏడాది మిగిలిన సమావేశాల్లో మరో రెండు 25 బేసిస్ పాయింట్ల తగ్గింపులను మార్కెట్ అంచనా వేస్తోంది’’ అన్నారు.
జియోపాలిటికల్ ప్రభావం
రష్యా-ఉక్రెయిన్ యుద్ధం, మధ్యప్రాచ్య ఘర్షణలు కొనసాగుతుండటంతో సేఫ్హేవన్ ఆస్తులపై డిమాండ్ బలపడింది. దీని వలన బంగారం, వెండి ధరలు అధిక స్థాయిలో నిలకడగా కొనసాగుతున్నాయి.
Also Read : Today Gold Price : మళ్లీ పెరిగిన పసిడి ధరలు
