EPFO New Innovation : తమ వినియోగదారులకు అదిరిపోయే శుభవార్త చెప్పిన 'ఈపీఎఫ్ఓ' సంస్థ

EPFO : ఉద్యోగుల ప్రావిడెంట్ ఫండ్ ఆర్గనైజేషన్‌ (EPFO) పెన్షనర్లకు శుభవార్త అందించబోతోంది. గత 11 సంవత్సరాలుగా మార్పు లేకుండా ఉన్న కనీస నెలవారీ పెన్షన్ పెంపుపై సంస్థ చర్చలు ప్రారంభించింది. ఈ అంశంపై తుది నిర్ణయం అక్టోబర్ 10–11 తేదీలలో బెంగళూరులో జరగనున్న సెంట్రల్ బోర్డ్ ఆఫ్ ట్రస్టీల సమావేశంలో తీసుకునే అవకాశం ఉంది. ఈ సమావేశంలో పెన్షన్ పెంపుతో పాటు సేవలను డిజిటలీకరణ చేసే EPFO 3.0 విధానం మరియు పరిపాలనా సంస్కరణలపై కూడా చర్చించనున్నారు.

EPFO – ప్రస్తుతం పరిస్థితి

ప్రస్తుతం ఎంప్లాయీస్ పెన్షన్ స్కీమ్‌ (EPS-95) కింద కనీస నెలవారీ పెన్షన్ రూ.1,000గా ఉంది. 2014 నుంచి ఈ మొత్తంలో ఎటువంటి మార్పు జరగలేదు. పెరుగుతున్న జీవన వ్యయం, ద్రవ్యోల్బణం కారణంగా పెన్షనర్లు తీవ్ర ఇబ్బందులు ఎదుర్కొంటున్నారు. ఈ నేపథ్యంలో ఉద్యోగ సంఘాలు చాలా కాలంగా పెన్షన్ పెంపు కోసం డిమాండ్ చేస్తున్నాయి. కొన్ని సంఘాలు కనీస పెన్షన్‌ను రూ.7,500కు పెంచాలని కోరుతున్నాయి.

పెంపు ఎంత వరకు?

నివేదికల ప్రకారం, ఈపీఎఫ్ఓ కనీస పెన్షన్‌ను రూ.2,500 వరకు పెంచే అవకాశాన్ని పరిశీలిస్తోంది. ఈ నిర్ణయం బోర్డు సభ్యుల ఏకాభిప్రాయంపై ఆధారపడి ఉంటుంది. తుది ఆమోదం మాత్రం కేంద్ర ప్రభుత్వానిదే. పెన్షన్ పెంపు నిర్ణయం అమల్లోకి వస్తే EPS-95 కింద ఉన్న సుమారు 70 లక్షల మంది పెన్షనర్లకు ఊరట లభించనుంది. ఈ పథకం కింద ఉద్యోగులు తమ జీతంలో కొంత భాగాన్ని ఈపీఎఫ్ఓకి చెల్లిస్తారు, అది రిటైర్మెంట్ తర్వాత నెలవారీ పెన్షన్ రూపంలో తిరిగి వస్తుంది.

EPFO 3.0 – డిజిటల్ సంస్కరణలు

పెన్షన్ పెంపుతో పాటు ఈపీఎఫ్ఓ తన సేవలను పూర్తిగా డిజిటల్, కాగితరహిత విధానంలోకి మార్చే దిశగా అడుగులు వేస్తోంది. “EPFO 3.0” పేరుతో ఈ కొత్త విధానాన్ని త్వరలో ప్రవేశపెట్టనున్నారు. దీని ద్వారా సభ్యులకు మరింత సౌలభ్యం లభించనుంది.