తిరుమ‌ల : తిరుమ‌ల భ‌క్త బాంధ‌వుల‌తో కిట కిట లాడుతోంది. ఎటు చూసినా గోవింద నామ స్మ‌ర‌ణే. శ్రీవారి నవరాత్రి బ్ర‌హ్మోత్స‌వాలు అంగ‌రంగ వైభ‌వోపేతంగా కొన‌సాగుతున్నాయి. ఉత్స‌వాల‌కు భ‌క్తుల రాకతో సంద్రాన్ని త‌ల‌పింప చేస్తోంది. ఇందుకు అనుగుణంగా టీటీడీ ఆధ్వ‌ర్యంలో భారీ ఏర్పాట్లు చేశారు. ఇక శ్రీవారి నవరాత్రి బ్రహ్మోత్సవాల్లో భాగంగా ఆరవ రోజైన శనివారం రాత్రి పుష్పక విమానంపై రుక్మిణి, సత్యభామ సమేతంగా గోవర్ధనగిరిధారి శ్రీకృష్ణుని అలంకారంలో శ్రీ మలయప్ప స్వామి వారు భక్తులకు అభయమిచ్చారు. స్వామి వారి దివ్య మంగళ రూపం భక్తులను విశేషంగా ఆకట్టుకుంది. మూడు సంవత్సరాలకు ఒకసారి అధిక మాసం సందర్భంగా నిర్వహించే నవరాత్రి బ్రహ్మోత్సవాల్లో పుష్పక విమాన సేవను నిర్వహించడం విశేషం. వాహన సేవల అనంతరం స్వామి, అమ్మ వార్లు సేదతీరే సంప్రదాయంలో భాగంగా ఈ సేవను నిర్వహిస్తారు.
కొబ్బరి చెట్ల ఆకులతో రూపొందించిన ఈ ప్రత్యేక పుష్పక విమానం 24 అడుగుల ఎత్తు, 15 అడుగుల పొడవు, 15 అడుగుల వెడల్పుతో, సుమారు ఒక టన్ను బరువు ఉంటుంది. వివిధ రకాల సంప్రదాయ పుష్పాలతో దీనిని సుందరంగా అలంకరించారు. విమానానికి ఇరువైపులా శ్రీ ఆంజనేయస్వామి, శ్రీ గరుత్మంతుడు, నాలుగు యుగాలకు చెందిన దేవతామూర్తుల రూపాలను తీర్చిదిద్దారు. తమిళనాడుకు చెందిన నిపుణులు, టీటీడీ గార్డెన్ విభాగం సిబ్బంది వారం రోజుల పాటు శ్రమించి ఈ అద్భుత పుష్పక విమానాన్ని సిద్ధం చేసినట్లు టీటీడీ గార్డెన్ డిప్యూటీ డైరెక్టర్ శ్రీనివాసులు తెలిపారు. చెన్నైకి చెందిన దాత శ్రీ రాంప్రసాద్ భట్ ఈ పుష్పక విమాన రూపకల్పనకు సహకారం అందించారు. ఈ కార్యక్రమంలో టీటీడీ ఈవో ముద్దాడ రవిచంద్ర, అదనపు ఈవో సి.హెచ్. వెంకయ్య చౌదరి, సీవీఎస్వో మురళీకృష్ణ తదితర అధికారులు పాల్గొన్నారు.