తిరుమల : తిరుమల తిరుపతి దేవస్తానం పాలక మండలి (టీటీడీ) కీలక ప్రకటన చేసింది. శనివారం అధికారికంగా ఆస్థానాల నిర్వహణకు సంబంధించి వివరాలు వెల్లడించింది. తెలుగు ఉగాది, శ్రీరామనవమి వంటి ముఖ్యమైన పండుగలు రాబోతున్న నేపథ్యంలో, ఈ సంవత్సరం మార్చి నెలలో తిరుమల ఆలయంలో వరుసగా మూడు ‘ఆస్థానాలు’ నిర్వహించడానికి ఏర్పాట్లు జరిగాయని తెలిపింది .ఆస్థానం’ అంటే సంప్రదాయ బద్ధమైన ‘ఆలయ సభ’ అని అర్థం; ఆలయంలో ప్రత్యేకంగా నిర్ణయించిన శుభ సందర్భాలలో దీనిని సాధారణంగా గరుడాళ్వార్ సన్నిధిలో నిర్వహిస్తారు.
‘శ్రీ పరాభవ’ నామ సంవత్సర ఉగాది పర్వదినం నాడు మూల విరాట్టుకు, ఉత్సవమూర్తులకు నూతన వస్త్రాలను అలంకరిస్తారు. వేద పండితులు స్వామి వారి సన్నిధిలో ఆ సంవత్సరపు ‘పంచాంగాన్ని’ వినిపించి, ఉదయం 7 గంటల నుండి 9 గంటల మధ్య ఆస్థానాన్ని నిర్వహిస్తారు. మార్చి 27న వచ్చే శ్రీరామ నవమి పర్వదినం సందర్భంగా, రాత్రి 9 గంటల నుండి 10 గంటల మధ్య గరుడాళ్వార్ సన్నిధిలో ఈ ఆలయ ఆస్థానాన్ని నిర్వహిస్తారు. దీనికి ముందుగా, ఇదే సందర్భాన్ని పురస్కరించుకుని తిరుమలలో సాయంత్రం 6:30 నుండి 8 గంటల మధ్య ‘హనుమంత వాహన సేవ’ కూడా నిర్వహించ బడుతుంది.
ఈ ఆస్థానంలో భాగంగా, వేద పండితులు శ్రీమద్ రామాయణం నుండి ‘శ్రీరామ జననం’ (శ్రీరాముని జనన వృత్తాంతం) ఘట్టాన్ని పఠించి, ఆస్థాన కార్యక్రమాన్ని పూర్తి చేస్తారు . శ్రీరామ నవమి జరిగిన మరుసటి రోజున, తిరుమల ఆలయంలో రాత్రి 8 గంటల నుండి 9 గంటల మధ్య ‘పట్టాభిషేక ఆస్థానం’ నిర్వహించ బడుతుందని తెలిపింది టీటీడీ. ఈ సందర్భంలో, వేద పండితులు పవిత్ర ఇతిహాసమైన శ్రీమద్ రామాయణం నుండి శ్రీరామచంద్రమూర్తి ‘పట్టాభిషేక మహోత్సవ’ ఘట్టాన్ని పఠించి వినిపిస్తారు.
