హైద‌రాబాద్ : న‌టుడు గోపీచంద్ న‌టిస్తున్న ‘భారత వర్ష’ చిత్రం నుండి ‘అమ్మ కదిలివచ్చే’ పాట ప్రోమో విడుదలైంది. ఈ సినిమా టైటిల్ గ్లింప్స్ , ఇతర ప్రచార చిత్రాలు ఇప్పటికే నెటిజన్ల దృష్టిని ఆకర్షించాయి. ఇప్పుడు చిత్ర బృందం అమ్మ కదిలివచ్చే అనే రెండవ పాట ప్రోమోను విడుదల చేసి సినిమాపై అంచనాలను మరింత పెంచింది. గోపీచంద్ ‘భారత వర్ష’ అనే పీరియాడిక్ సినిమాతో అద్భుతమైన పునరాగమనం చేయడానికి సిద్ధమయ్యారు. ఈ సినిమా ప్రేక్షకులను క్రీ.శ. 642 నాటి కాలానికి తీసుకువెళ్లి, ‘శూల’ ప్రాంతానికి సంబంధించిన కథను వెండితెరపై ఆవిష్కరించనుంది. ఇప్పటికే ఈ సినిమా టైటిల్ గ్లింప్స్ , ఇతర ప్రచార అంశాలు నెటిజన్ల ఆసక్తిని రేకెత్తించాయి. తాజాగా విడుదలైన అమ్మ కదిలివచ్చే పాట ప్రోమో సినిమాపై అంచనాలను మరింత పెంచేలా చేసింది.
దసరా నవరాత్రుల సందర్భంగా, దుర్గాదేవికి సంబంధించిన భక్తిభావం , సాంప్రదాయ ఆచారాలను అందంగా ప్రతిబింబించేలా ఈ పాటలోని కొంత భాగాన్ని చిత్ర బృందం అందించింది. ఇందులో గోపీచంద్ యోధుడి వేషధారణలో ఆకట్టుకునేలా కనిపిస్తుండగా, భక్తిపూర్వక ఆచారాలలో పాల్గొంటున్న మహిళల మధ్య రీతూ వర్మ కనిపిస్తున్నారు. ఈ దృశ్యాలు సినిమా చారిత్రక నేపథ్యాన్ని పరిచయం చేయడమే కాకుండా పూర్తి పాట పట్ల ఆసక్తిని కలిగించాయి. పూర్తి పాట అక్టోబర్ 14న బుధ‌వారం విడుదల కానుంది. ఈ సినిమా వివరాల విషయానికొస్తే ‘ఘాజీ’, ‘అంతరిక్షం’ ‘పిట్ట కథలు’ వంటి చిత్రాలతో గుర్తింపు పొందిన ప్రముఖ దర్శకుడు సంకల్ప్ రెడ్డి దీనికి దర్శకత్వం వహిస్తున్నారు. ఇప్పటి వరకు భారత్-పాకిస్థాన్ జలాంతర్గామి యుద్ధ నేపథ్య కథలు , కల్పిత అంతరిక్ష సాహస గాథలను ప్రయత్నించిన ఆయన, ఇప్పుడు ఒక చారిత్రక యుద్ధ నేపథ్య చిత్రంతో ప్రేక్షకులను అలరించడానికి సిద్ధమయ్యారు.