అమెరికా : ఓపెన్ ఏఐ సంస్థ సంచలన ప్ర‌క‌ట‌న చేసింది. త‌న ఏఐ ఏజెంట్లు ఊహించని విధంగా ప్రవర్తిస్తున్నాయని ధృవీకరించింది. 100కి పైగా సంస్థల వ్యవస్థల్లోకి అనధికారికంగా ప్రవేశించినట్లు గుర్తించిన‌ట్లు బాంబు పేల్చింది. క్లుప్తంగా చెప్పాలంటే తమ ఏఐ ఏజెంట్లు ఊహించని లేదా నియంత్రణ లేని రీతిలో ప్రవర్తించిన సంఘటనలపై సమీక్షిస్తున్నట్లు పేర్కొంది. అటువంటి ఏజెంట్ల కారణంగా తమ వ్యవస్థలు అనధికారికంగా యాక్సెస్ చేయబడి ఉండవచ్చని 100కి పైగా సంస్థలకు సమాచారం అందించినట్లు కంపెనీ తెలిపింది. ఈ విష‌యాన్ని త‌న అధికారిక బ్లాగ్ లో పేర్కొంది. గత జూలైలో ‘హగ్గింగ్ ఫేస్’ వద్ద జరిగిన ఒక సంఘటన తర్వాత తాము మోడల్ కార్యకలాపాలను సమీక్షిస్తున్నట్లు ఏఐ ల్యాబ్ తెలిపింది. ‘హగ్గింగ్ ఫేస్’పై జరిగిన దాడి తీవ్రతతో సమానమైన లేదా అంతకంటే ఎక్కువ తీవ్రత కలిగిన సంఘటనలేవీ ఇప్పటి వరకు గుర్తించలేదని ఓపెన్ ఏఐ పేర్కొంది.
ఏదైనా ఏఐ మోడల్ ద్వారా సంస్థల వ్యవస్థలు అనుమతి లేకుండా యాక్సెస్ చేయబడినట్లు గుర్తిస్తే, ఆయా సంస్థలకు వ్యక్తిగతంగా సమాచారం అందిస్తుందని వెల్ల‌డించింది. గతంలో, ‘సర్వీసెస్ ఆస్ట్రేలియా’కు పంపిన ఒక ఈమెయిల్ వెలుగులోకి వచ్చింది, దీని ద్వారా కంపెనీ ఇటువంటి హెచ్చరికలను ఎలా పంపుతుందో తెలిసింది. అయితే, ఒక నోటిఫికేషన్ వచ్చినంత మాత్రాన వ్యక్తిగత సమాచారం యాక్సెస్ చేయబడిందని లేదా మూడవ పక్షం వ్యవస్థ రాజీ పడిందని (భద్రత దెబ్బ తిన్నదని) అర్థం కాదని కంపెనీ స్పష్టం చేసింది. కొన్ని సందర్భాల్లో మోడళ్లు ఉద్దేశించని రీతిలో ఇంటర్నెట్ యాక్సెస్‌ను ఉపయోగించాయి లేదా వెనక్కి తిరిగి చూసుకుంటే, వాటిపై సరైన పరిమితులు లేవని తేలింది అని ఓపెన్ ఏఐ పేర్కొంది.
